Asociacion di Comerciante Chines a tuma nota di e situacion cu a surgi rond di aumento di prijs di cierto producto.
Pa medio di un comunicado cu nan a manda pa Bon Dia Aruba, presidente di asociacion aki William Cheng y su assistent Stephen Chen, pero tambe bistiendo nan pechi como miembro di e directiva di Chinese Club Aruba a referi cu na Aruba tin alrededor di 200 super/minimarket Chines. E asociacion por a ripara cu tin algun comerciante Chines a haci cambio, algun di nan hopi drastico, den nan prijs durante e weekend aki cu a pasa, debi na demanda halto pa producto door di e brote di virus COVID-19.
E asociacion ta cuestiona esunnan cu a haci’e pa motibonan di egoismo, caminda nan a probecha di e crisis y a duna otro comerciante di origen Chines cu no a haci’e un mal nomber. Club Chines tambe a pone esunnan cu a haci e acto aki na altura cu nan a actua den forma robes na un momento cu pueblo di Aruba tin mester di ayudo. Club Chines ta lamenta cu e acto di un grupo chikito di comerciante a causa hopi descontento y tension den e comunidad di Aruba.
Asociacion di Comerciante Chines na Aruba ta di acuerdo cu e accion di control tuma door di e departamentonan encarga bou di Gobierno, pa resolve e situacion causa door di actonan incorecto di poco comerciante. “Den e temporada nos dilanti nos tin cu uni, traha duro y sostene otro pa por combati e virus COVID-19. E comunidad Chines ta forma parti di pais Aruba y lo t’ey pa sostene e pueblo di Aruba”, segun e asociacion.
Comentarionan negativo
Sinembargo nan ta lamenta cu banda di e situacion cu a surgi rond di aumento di prijs, nan por a mira ariba rednan social (Facebook) durante weekend ultimo, cu hopi hende a post hopi comentario negativo dirigi na Chinesnan en general.
Den su comunicado, Asociacion di Comerciante Chines y Chinese Club Aruba ta compronde e situacion cu a causa tension den comunidad di Aruba, pero ta urgi pa no generalisa tur hende den e manera baho cu a haci ultimo dianan ariba media. Solamente asina nos por contribui pa crea un solo comunidad uni na Aruba. Pues mester elimina e ambiente di negativismo y yuda uni pueblo di Aruba y comunidad Chines di Aruba. Comunicacion constructivo ta importante pa logra un comunidad uni.
