Departamento di Salubridad Publico a tene sesion di informacion via Facebook

Diaranson anochi, Departamento di Salubridad Publico (DVG) a tene un sesion en bibo riba nan pagina di Facebook tocante e tema di coronavirus, durante cual ciudadanonan den sintonia por a haci pregunta tocante e pandemia aki.

Coronavirus (COVID-19) recien a keda declara un pandemia mundial segun Organisacion Mundial di Salud (WHO). Rond mundo actualmente a keda confirma mas di 130mil caso di infeccion di COVID-19, cu casi cinco mil morto pa e malesa. Mirando cu e pandemia ya ta afectando 127 pais y teritorio, autoridadnan di Salud di Aruba ta confirma cu ta cuestion di tempo prome cu nos isla tambe cuminsa registra su prome casonan.

Sinembargo, autoridad di salud internacional ta insisti cu mayoria di e casonan di coronavirus ta presenta unicamente sintoma leve, y cu gran mayoria di persona ta recupera. Pero mirando e rapidez di e pandemia, tin cantidad di mal informacion y miedo circulando na tur parti di mundo, nos isla no ta un excepcion.

Cu tanto reportahe andando, DVG a dicidi di tene un conferencia transmiti en bibo pa asina comparti tur informacion oficial y evita cualkier panico y confusion, como tambe duna contesta na preguntanan di e ciudadanonan den sintonia.

Presente durante e sesion aki tabata Dr. Wilmer Salazar, consehero medico di DVG, kende a splica cu COVID-19 ta un novel coronavirus cu ta afecta principalmente pulmon, y cu por genera complicacion manera pneumonia. El a bisa cu mortalidad ta mas tanto entre hendenan di edad avansa of cu tin problema cronico di pulmon, di curason, of otro malesa cu ta afecta sistema di defensa.

Salazar a insisti cu actualmente ainda no tin caso na Aruba, pero cu nan ta preparando pa momento cu un persona cu e virus yega na Aruba, preveni e expansion di e malesa lo mas posibel. El a bisa cu e virus ta transmiti cu contacto cercano, un persona cu tin sintoma respiratorio cerca di alrededor di 1m di otro, si e tosa, e virus ta bay den aire, bay riba boca of nanishi di otro persona y asina e por wordo afecta. Riba un superficie, e virus por biba di 2 pa 5 dia, pues si un persona enfermo ta mishi un superficie, otro persona cu mishi esaki despues lo por bira infecta. Esaki ta e motibo pa insisti riba higiena, cual ta keda e conseho principal, laba man (corectamente).

Sintomanan principal ta relaciona na pulmon: keintura, tosamento (seco na cuminsamento y despues cu slijm), y si sigui avansa, por haya dificultad pa hala rosea.

A puntra cuanto mashin pa hala rosea tin na Aruba. A aclaria cu ta un parti hopi chikito di persona cu ta bay tin necesidad di esaki. Segun DVG, hospital tin suficiente mashin, y ademas ta coordinando cu otro paisnan cercano pa por ricibi esakinan, por ehempel di Colombia, pa tin refuerso. Hospital tin 10 camber di cuido intensivo pa atende cu e pashentnan critico, pero tin camber di isolacion den cual lo por atende mas pashent cu mester oxigeno. Sinembargo, ta aclara cu no por pone tur 10 camber di ICU pa pashent cu coronavirus.

Tambe a puntra si a haci algun test caba, y cuanto. Segun DVG, pafo di hospital ta bezig pa test, pero te awo tur a sali negativo.

Salazar a informa cu actualmente ta check pais di origen di e turistanan cu ta bin. Si nan ta bin di luga unda tin brote di virus, ta check si nan tin sintoma respiratorio, cu ta esey ta locual nan ta check. Cada pais ta autonomo pa selecta e medidanan cu kier tuma. No tin restriccion di WHO pa ningun pais actualmente, pues DVG ta simplemente conseha pa no biaha na paisnan cu tin un cantidad grandi di caso.

Un inkietud grandi cerca comunidad ta pa cu remedi. Epidemiologo durante e conferencia a bisa cu ta importante pa recorda cu COVID-19 ta un virus, pues ta cura di su mes despues di dado tempo. “Niun remedi ta cura virus mas lihe cu bo sistema inmuun”, el a bisa. Sinembargo a bisa cu ta dispone di algun remedi cu por yuda den casonan severo na hospital, pero cu esaki no ta necesario den casonan leve, ‘no lo yuda’.

Tocante temperatura halto, manera clima di nos isla, ta un factor cu ta reduci sobrevivencia di e virus. Sinembargo, e efecto di esaki ta chikito. Den temperatura friu e virus por biba riba un superficie pa mas largo; mientras den temperatura cayente esaki por ta menos. Sinembargo, esaki no ta afecta pa transmision directo entre hende, ni den casnan unda por ehempel tin airco, unda e virus por sobrevivi te casi un siman.

Finalmente ta sugeri pa tene bo mes mas saludabel cu ta posibel. Dr. Van Trigt a conseha pa protege famia y ta prepara pa e virus, zorg pa tin ‘basislevensmiddelen’, manera awa, cuminda suficiente pa por cushina, fruta, berdura, y mas importante, zorg pa drumi suficiente. Na momento cu haya keintura, ta recomenda pa tin sikiera paracetamol na cas. Pa cualkier otro necesidad, por tuma contacto cu dokter di cas.