Loke nos ta paga na impuesto ta hopi o poco? Semper mester ta relaciona esaki cu loke nos como pais tin na entrada, pa por duna un idea unda nos ta para. Pa mayor claridad di publico nos a elabora un comparacion di e ultimo seis aña, a base di e cifranan di Banco Central (Annual Statistical Digest) y cifra di Presupuesto 2020.
Nos ta compara entrada di impuesto pa e añanan 2014 – 2020, y entrada total di gobierno cu nos GDP (Gross Domestic Product) nominal pa e mesun añanan ey. E cifranan di GDP ta esunnan actualisa despues cu e evaluacion di CBS a keda acepta pa Banco Central y instancianan internacional.
Total impuesto y total entrada Pais Aruba 2014 – 2020, compara cu GDP (Miyon Afl.)
| Aña | 2014 | 2015 | 2016 | 2017 | 2018 | 2019 | 2020 |
| Total Impuesto | 1001.8 | 1034.2 | 1074.9 | 1087.5 | 1141.5 | 1236.2 | 1211.0 |
| Total Entrada | 1117.9 | 1211.5 | 1214.4 | 1220.0 | 1299.4 | 1402.4 | 1529.6 |
| GDP nominal | 4849 | 5226 | 5309 | 5471 | 5734 | 5791 | 5849 |
| Impuesto (% di GDP) | 20.6 | 19.7 | 20.2 | 19.8 | 19.9 | 21.3 | 20.7 |
| Total entrada (% di GDP) | 23.0 | 23.0 | 22.8 | 22.3 | 22.6 | 24.2 | 26.1 |
Fuente: Banco Central Aruba (Annual Statistical Digets 2018); Presupuesto Aruba 2020
Loke nos por observa den e tabel aki ta cu pa varios aña entrada di impuesto ta mustra stabiel pa henter e periodo. Tambe pa e periodo prome cu esaki, pero nos a limita nos mes na esaki pa via di espacio. E momento cu mas recurso ta bay pa gobierno den forma di impuesto ta na 2019, producto di e aumento di BBO/BAZV/BAVP e aña ey. Pa 2020 ta mustra cu e porcentahe aki lo baha, tumando na cuenta si cu e cifra aki ta basa riba e proyeccion di gobierno di 1% crecemento nominal. Cu tur e desaroyonan di ultimo lunanan, especialmente e desaroyo negativo cu por spera den turismo a causa di e coronavirus, naturalmente mester mira ainda si nos ta yega na e crecemento sumamente modera ey.
Ora nos compara e cifranan di entrada total di gobierno, nos ta mira cu durante 2019 y pa 2020 entrada total di gobierno ta aumenta drasticamente te mas di 26% na 2020, principalmente impulsa pa entrada cu gobierno ta haya di otro fuente, principalmente di dividendo di e diferente entidadnan estatal, cu ta pasa esaki pa gobierno como representante di Pais Aruba, propietario di e entidadnan aki. Con grandi e contribucion aki ta? Comparando 2014 y 2020 nos por observa cu na 2014 gobierno tabata haya Afl. 116 miyon di otro fuente, cu no ta impuesto, y na 2020 esaki lo ta Afl. 318,6 miyon, mas di Afl. 200 miyon mas. Si nos bay back den e añanan anterior tampoco nos lo topa aña cu recurso asina grandi procedente di fuente cu no ta impuesto.
Esaki naturalmente ta trece e pregunta si e contribucion fuerte aki di sector di empresa/entidad publico na caha di gobierno ta cuadra cu garantia di viabilidad di e entidadnan aki. Gobierno a declara cu e rentabilidad di e entidadnan aki no ta na peligro. Esey ta dificil pa un ciudadano averigua, ya cu mayoria di e entidadnan aki no ta publica nan cuenta anual. Ta di spera cu por bin mas transparencia den esaki, cu tur entidad publico obligatoriamente publicando nan cuenta anual.
