Aeropuerto Reina Beatrix di Aruba a cuminsa tuma pasonan adicional pa preveni expansion di coronavirus y e malesa cu e ta ocasiona, COVID-19.
Segun un relato den portal online noticiacla.com, ademas di e limpiesa diario den areanan publico, a pone disponibel mashin sanitizer y aparato pa habon adicional den areanan strategico. Ademas ta haci e rutina di limpiesa mas riguroso, mirando cu virus di COVID-19 por biba riba un superficie pa mas di un siman si ta den un temperatura di alrededor di 25C, manera ta e caso den areanan cu tin airco.
Ademas, segun e relato di noticiacla, den areanan di entrada y salida di aeropuerto ta comparti tip regular di salud den coordinacion cu Departamento di Salubridad Publico (DVG), pa asina tur biahero cu yena nos isla por ta consciente, tambe mientras ta na aeropuerto.
Aeropuerto a solicita pa personal cu ta malo keda cas, y a pidi empleadonan cu no ta raporta directamente na aeropuerto pa keda cas. Tambe pa team di aeropuerto no biaha pa areanan di riesgo halto – unda e brote di coronavirus ta mas extremo – y pa trece e asunto dilanti cu autoridad prome.
Ademas di crea un chat group pa tur miembro di personal por keda al tanto di ultimo desaroyonan relaciona cu e malesa, a activa un team den aeropuerto dedica na monitor e situacion constantemente. E team lo tuma medida preventivo si considera necesario.
Tur esaki pa cumpli cu protocol di Organisacion Mundial di Salud (WHO) y otro instancianan di salud.
