E luna aki, clientenan di WEB a haya nan mes cu e cobransa y pago di dos recibo pa e servicio aki. E prome recibo ta e cobransa di luna di januari cu mester pag’e prome cu dia 9 di maart.
E di dos recibo di luna di februari su pago ta caduca awe, 12 di maart pa algun grupo di cliente di WEB; pero e ta diferente pa cada cliente cada luna. E fecha ultimo di pago di cada cuenta di awa ta varia entre dos pa tres dia cada luna. Pa e clientenan por haya sa nan ultimo fecha di pago nan por consulta e compania su WEB Care via e link: https://altovista.webaruba.com/login.html
E compania di utilidad a dicidi di bin cu un flexibilidad riba e pago di cobransa di februari. Aunke ta recomendabel pa e cliente pag’e lo mas tempran posibel pa evita acumulacion di pago cu lo resulta mas pisa despues pa nan.
Ta asina cu recientemente e compania a splica via un carta di notificacion of noticia importante – manda via post pa nan clientenan y acompaña cu e recibo di cobransa di e cuenta di awa di februari 2020– cu na luna di november ultimo nan a informa riba e cambio relaciona cu e fecha ultimo di pago, caminda nan ta introduci un fecha nobo, diferente di e fecha fiho custumbra cu tabata dia 9 di cada luna.
E biaha aki e ultimo fecha pa paga e cuenta di februari ta para ariba nan recibo di pago. Y cada cuenta cu lo bini despues ta depende di e dia ariba cual a lesa bo meter di awa den e luna anterior. WEB ta aclaria cu en todo caso, e lo caduca 30 dia despues di a lesa e meter.
E hecho aki a trece diferente reaccion mirando cu tin clientenan pa ken e pago di dos recibo di WEB riba e mesun luna ta cay hopi pisa pa nan. Prome minister Evelyn Wever-Croes, como minister encarga cu asunto general y di utilidad, a yega di declara cu e no a wordo consulta di e cambio aki door di e compania di utilidad WEB pa introduci un fecha nobo di cobransa. El a haya sa di e cambio aki apenas algun dianan pasa.
Bon Dia Aruba a consulta PR di WEB, Asja Dongen, kende a laga nos sa cu e cobransa ta bayendo bon. Aunke ta hopi prematuro pa bisa algo di e pago, debi cu ainda e luna aki ta coriendo, y no por haci comparacion.
El a indica cu nan clientenan ta reaccionando cu e informacion ta claro y comprendibel. Sinembargo WEB tin comprension cu e pago di dos recibo e luna aki, debi na e cambio di fecha nobo cu nan kier introduci, por cay dificil pa algun cliente. Ya cu tin cliente cu ta indica cu nan no por paga dos cuenta di awa den un luna.
Dongen a laga sa na e matutino aki cu pa esunnan cu tin dificultad pa paga e di dos cuenta, cu ta caduca na maart relaciona cu e cuenta di consumo di februari, WEB ta informa cu nan tin te 31 di mei 2020 pa pag’e. Esaki sin cu WEB lo cobra boet y sin cu mester aplica pa un areglo di pago.
El a splica cu si bo paga e cuenta di consumo di februari despues di 31 di mei, si lo cobra boet, lo desconecta e servicio y lo no tin posibilidad di areglo di pago pa e cuenta di consumo di februari. El a laga sa cu no ta recomenda pa tarda cu e pago, door cu na april ta bini e cuenta di consumo di maart, na mei ta bini esun di april, pues e lo keda acumula. Mas informacion nan clientenan por wak aviso den corant, pero tambe video riba pagina di Facebook di WEB Aruba.
