Capacidad di islanan chikito ta limita: Solucion pa atende cu crucero Braemar no ta na Corsou ni Aruba

Ayera a tuma luga un conferencia di prensa di Ministerio di Salud Publico, Medio Ambiente y Naturalesa na Corsou tocante e caso di personanan abordo di e barco crucero MS Braemar cu a duna positivo pa coronavirus. Aunke e situacion aki ta tumando luga na Corsou, e nomber di Aruba a resona durante e conferencia transmiti pa Tele Curaçao.

Epidemiologo Dr. Izzy Gerstenbluth, kende ta hefe di departamento di Epidemiologia, a referi na e resultado di e test haci riba e barco, caminda 5 persona a resulta positivo pa Covid-19. Nan a test 7 hende abordo di e crucero cu tin abordo mil pasahero. Tur shete a keda isola, pero e cifra a aumenta pa 9 (6 tripulante y 3 pasahero), caminda e chens cu e lo sigui plama abordo ta grandi.

Dr. Gerstenbluth a bisa cu di e 9 personanan isola, 5 ta confirma positivo, 1 cu ta casi sigur cu tin’e, y tres mas cu ainda no a wordo confirma, pero cu tin e sintomanan. Mayoria di hendenan abordo nan nacionalidad ta di Filipina, tambe tin di Italia, India, Indonesia, Reino Uni; y di Hulanda tin dos hende abordo so.

Nan a haci e test na e grupo aki, ya cu nan tabata presenta e sintomanan, pero tambe nan tabatin contacto cu e prome hende cu a test positivo cu a wordo isola den e barco, pero ya caba tabatin contacto cu mas hende cu a bira potencial sospechoso di tin e virus.

Dr. Gerstenbluth a bisa cu tabatin contacto cu su colega di Aruba, mirando cu inicialmente e barco a pidi pa desembarca su hendenan na Aruba, ya cu Barbardos cu tabata e puerto cu nan mester a bay. A abstene di ricibi nan pasobra nan no tabatin capacidad pa atende nan. Mirando cu Corsou ta parti di Reino, nan mester meld e situacion aki pa Hulanda, pa asina alerta e otro puertonan cu tin caso positivo di coronavirus, den e ruta cu e crucero Braemar tin. Ademas nan a informa PAHO tambe riba e situacion aki.

Ayera Bon Dia Aruba a purba di tuma contacto cu minister di Salubridad, Dangui Oduber pa haya sa si den cuadro di cooperacion y areglo cu tin den Reino, con Aruba por yuda Corsou, pero te ainda nos no a haya niun reaccion for di e mandatario. Di su banda, Dr. Gerstenbluth a referi cu si nan ta buta tur e hendenan abordo bao cuarentena pa dos siman y monitor nan, ni Aruba ni Corsou, no tin e capacidad pa haci esey.

Ademas si nos tabatin e capacidad, e no ta considera prudente mirando cu te ainda no tin niun caso den e islanan aki, cu nan lo bay atende directamente cu un barco cu mil hende di afo, caminda tin caso di coronavirus abordo. Algo diferente lo tabata si e malesa ta plama den nos paisnan, ya cu ta bo propio poblacion cu bo tin cu proteha, limita y mitiga e plamamento, y te hasta e ta considera cu nos tin e capacidad ey.

Riba e preocupacion cu e islanan chikito no tin e capacidad pa atende cu hopi hende pareu contagia cu e virus -segun Dr. Gerstenbluth- PAHO a wordo poni na altura di dje den un otro oportunidad. No ta cuestion cu e islanan manera Corsou of Aruba no kier of cu nan ta inhumano, sino cu nos no tin e capacidad, el a bisa. “Nos mester ta realistico den e habilidad cu nos tin pa atende tanto hende pareu,” el a bisa. Esaki no ta kita cu nos mester ta parti activo di e buskeda di solucion. El a bisa bon cla cu e solucion no ta ni Corsou ni Aruba; y autoridad internacional sa di dje.

Unabes cu a confirma cu tabatin e virus abordo di e barco crucero Braemar a evalua e diferente alternativa pa atende cu e situacion aki, cu a bira uno internacional, ya cu e hendenan abordo mester di cuido, cuminda, etc. Pero nan no tabatin ainda mucho claridad riba esey, y tampoco for di unda e ayudo lo bini directamente si e hendenan isola mester di e cuido necesario.