Iran ta continua proveyendo inspectornan internacional acceso na su facilidadnan nuclear activo, hasta despues di su anuncio cu no ta mara mas pa ‘cualkier restriccion’ di e acuerdo na 2015 cu podernan mundial, diseña pa preveni e pais di produci un arma nuclear, segun lider di agencia vigilante atomico di Nacionnan Uni a bisa dialuna.
Rafael Grossi, director general di Agencia Internacional di Energia Atomico, tambe a bisa miembronan di hunta na Vienna cu desde anuncio di Tehran dia 5 di januari, ta parce cu Iran no a escala su violacion di e pacto nuclear, conoci como e ‘Plan Conhunto di Accion Comprensivo’ (JCPOA).
“E agencia no a observa ningun cambio na implementacion di Iran di su compromisonan relaciona cu energia nuclear bou di JCPOA den conexion cu e anuncio aki, ni den nivel di cooperacion di Iran relaciona na actividad di verificacion y monitor di e agencia bou JCPOA”, Grossi a bisa.
Den lunanan recien, Iran a viola tur provision principal di e pacto, aumentando uranio enrikeci y awa pisa mas leu di su limite, agregando centrifugonan prohibi, y enrikeciendo uranio mas leu di e puresa permiti.
Siman pasa, e agencia a bisa den un reporte na nacionnan miembro cu su inspectornan a confirma cu Iran a casi triplica su cantidad di uranium enrikeci desde november, violando e acuerdo nuclear.
JCPOA, firma pa Iran cu Merca, Alemania, Francia, Reino Uni, China y Rusia, ta permiti apenas 202.8 kg di uranium tiki enrikeci.
JCPOA a priminti Iran incentivo economico a cambio di e limite riba su programa nuclear, pero desde cu presidente Donald Trump a retira Merca unilateralmente di e acuerdo na 2018 y a impone sancion nobo, economia di e pais ta pasando momento dificil.
“E agencia a identifica un cantidad di pregunta relaciona na posibel material nuclear no declara y actividadnan relaciona na tres sitio cu no ta declara pa Iran”, Grossi a bisa. “E agencia a busca acceso na dos di e sitio. Iran no a duna acceso na e sitionan aki y no a participa den discusion substantivo pa clarifica preguntanan di e agencia.”
