A pesar cu gobierno a anuncia un call center y tambe e instalacion di un centro di diagnostico, tin sector di nos comunidad cu ta skeptico riba con urgente lo atende cu un caso sospechoso di coronavirus.
Sinembargo minister di Salubridad Publico, Dangui Oduber a trece un mensahe di confiansa y credibilidad cerca nos comunidad pa haci uzo di e canal oficial den caso di un caso sospechoso di coronavirus, caminda lo atende cu nan diligentemente.
E hoben mandatario di salud ta haya importante pa comunidad por sinti e confiansa cu tur atencion ta wordo duna na personanan cu tin e sintomanan di coronavirus. Oduber a bisa cu for di awe mainta e call center ta disponibel pa asina crea e confiansa y credibilidad den comunidad cu tur caso ta wordo tuma na serio. Nan por yama na 2800101 den caso necesario di sospecha pa por haci e test pa descarta of no e virus.
Te aworaki probablemente esey no ta e caso, ya cu localmente no tin niun hende sospecha cu e virus. Si den caso un caso lo sucede, esaki probablemente lo bini di un turista. Tanto premier Wever-Croes como Oduber a indica cu den caso cu ta wordo registra un caso di coronavirus, nos comunidad lo wordo informa debidamente. Aunke no ta descarta cu e coronavirus por haci su presencia na Aruba, mirando e casonan registra na Hulanda y den nos region, pero te aworaki no tin niun caso na Aruba.
Gobierno a reitera cu Aruba ta prepara pa atende cu e famoso virus aki. Ya cu no ta trata cu e virus aki no ta bati nos porta, sino ki dia e lo sucede y con bon nos ta prepara. Prome minister, Evelyn Wever-Croes hunto cu su colega di Turismo y Salubridad, a bisa cu a eleva nivel na esun di crisis pa tin fondo disponibel pa atende cune. Pues Aruba no ta den un estado di emergencia. Nan ta atendiendo cune riba tereno di Salubridad, Turismo y tambe pa bin cu plan di contingencia economico, mirando cu ya caba hotelnan a cuminsa registra cancelacion. Pero nan ta pidi pa evita cualkier ambiente di panico.
