Parlamentario Shailiny Tromp-Lee kende ta presidente di e comision fiho di labor y sector primario, a referi cu e ta bin realisando diferente reunion di consulta, entre nan un cu el a sostene recientemente cu minister di Labor, Glenbert Croes, den cual nan a trata diferente topico. Nan ta topiconan di preocupacion cu ta forma parti di e agenda di comision di labor.
Un topico tin di haci cu e situacion di desempleo bao nos poblacion hoben. Diahuebs 27 di februari, nan tabatin un reunion cu e comision nacional encarga pa bin cu un maneho pa contraresta e problema aki na Aruba. E parlamentario a expresa su preocupacion riba e indice di desempleo den e grupo poblacional aki. P’esey el a haya importante cu gobierno a institui un comision pa traha riba e maneho y plan di accion specifico pa loke ta trata desempleo bao nos hobennan. El a contesta na Bon Dia Aruba cu tin data cu lo wordo uza pa mehora e situacion. Pero te ainda no a bay over pa stipula maneho. Aunke e institucion di e comision di parti di gobierno ta laat, ‘pero nos tin cu cuminsa un caminda’, el a bisa. E ta kere cu awo ta e momento.
Igualmente el a bisa cu tin proyectonan andando di departamento di Asunto Social pa cierto grupo por subi bek mercado laboral, y tambe di departamento di Progreso Laboral (DPL). Pero e ta haya cu eventualmente ainda nan no ta conoci. Of nan no ta traha cu otro, of nan no ta poni bao un solo capa of maneho. P’esey ta bon analisa e situacion aki, segun parlamentario Tromp-Lee. E no ta nenga cu ainda tin espacio riba e tereno aki pa e creacion di maneho nobo pa atende cu e desempleo bao nos hobennan.
E ta haya cu e cifra ta preocupante, ya cu desde 2011 e cifranan ta mustra cu nos tin un desempleo halto den nos poblacion hoben. For di e aña ey, 23.6% a registra un desempleo den e poblacion aki. Despues el a bira 22.8% na 2014. Na 2015 el a bira 18.2%, Na 2016 el a bira 17.9%. Na 2017 el a bira 19.4%. El a bisa cu e delaster porcentahe ta mustra cu na 2018 tabatin un bahada, ya cu el a bira 16.2%.
