Duda si Aruba ta bon prepara pa coronavirus

Mientras cu gobierno y departamento di Salubridad Publico di islanan di Reino ta informa publico riba nan maneho contra coronavirus y e malesa cu e ta ocasiona, COVID-19, den practica ta resalta cu e paisnan aki ta canando atras.

Esaki, segun un relato di Sharina Henriquez den noticiero online, caribischnetwerk, ta pa motibo cu implementacion di regulacion internacional di salud di Organisacion Mundial di Salud – reglanan cu tin como meta pa preveni transmision di malesanan infeccioso manera coronavirus – a keda hopi atras. E pakete di regla, guia y legislacion, entre otro, di WHO ta conoci como IHR, y lo mester ta implementa pa tur pais miembro.

Sinembargo, door cu ta mira cu esey no ta e caso na Aruba, awo nos isla tin mas problema cu maneho contra coronavirus si compara cu paisnan cu si a implementa e regulacion en cuestion.

Por ehempel, pa varios siman desde cu mundialmente a registra e brote di coronavirus, instancianan di Salubridad Publico na Aruba ta dunando instruccion pa yama dokter di cas prome, na momento cu tin sintoma sospechoso. Sinembargo no ta tur dokter di cas ta facil pa haya riba telefon; tampoco tin un protocol na luga – cual ta nifica cu cualkier dokter por tin un maneho diferente na momento di confronta un posibel caso di coronavirus.

Presidente di asociacion di dokter di cas HAVA, Joaquin van Trigt, a declara na Henriquez cu apenas diabierna ultimo a acorda un curso di accion cu Departamento di Salubridad Publico (DVG) y hospital HOH. Pashentnan mester por yama entre 7or di mainta y 6or di atardi. Y si no, por yama un linea di emergencia, riba cual mester contesta dentro di 30 seconde, segun Van Trigt.

Maske den principio Aruba, Corsou y St. Maarten tin propio responsabilidad pa implementa regulacion di WHO, cinco aña atras, toch Hulanda mester a firma un acuerdo di cooperacion cu e islanan, ya cu a resulta cu nan no tabata capaz di desaroya un maneho rapido y adecua pa riba nan mes combati malesanan infeccioso. Den esaki a pone Nederlandse Rijksinstituut voor Volksgezondheid en Milieu (RIVM) como punto di coordinacion, pues asina ta cu e instancia a resulta responsabel di tur isla den Caribe Hulandes.

Door di esaki ta manda test di coronavirus di Aruba pa RIVM pa segundo analisis, na luga di por ehempel un laboratorio mas cercano manera na Merca. Asina RIVM por keda monitor y reporta na WHO, pero tin consecuencia cu ta dura mas largo prome cu e pashent por haya resultado definitivo.

No tin epidemiologo

Otro medida importante den combate ta e presencia di specialista. RIVM ta afirma cu riba cada isla tin personal specialisa. Pero un specialista crucial den caso di un epidemia manera coronavirus, esta un epidemiologo, no tin na Aruba.

Personal di HOH no sa precies ken ta fungi den e rol di epidemiologo tampoco. “Esey ta Eugene, toch. Oh, e no ta epidemiologo. E ora ey mi no sa”, segun Marjolyn Maduro, specialista den prevencion di infeccion di e hospital. Tampoco el a yega di tende di e regulacion IHR di WHO, segun Henriquez.