Empresario, maestra, funcionario, enfermero, periodista, campesino, cuido di hogar… tur hende muhe di Mexico ta convoca pa no traha awe 9 di maart y asina por nota su ausencia den un protesta contra feminicidio.
Pero, kico lo por pasa cu economia si tur di nan ta uni pa e welga?
Hende muhe ta representa un poco mas di mita di poblacion Mexicano cu casi 64 miyon di un total di mas di 125 miyon habitante cu e pais Latino Americano tin, segun datonan oficial di Instituto Nacional di Estadistica y Geografia (Inegi).
Aunke su participacion den economia di e pais ta hopi importante, un desigualdad importante ta sigui existi ya cu nan ta representa 40% di e forsa laboral.
Di otro banda, hende muhe ta representa 77% di e trahadonan domestico sin salario. Kiermen, hopi hende muhe Mexicano ta sigui relega den nan hogar.
Di acuerdo cu un estudio di BBVA Bancomer Mexico, efecto di e welga lo por alcansa 34.571 miyon peso (mas di 1.700 miyon dollar), di cual 23.200 miyon peso (mas di 1.150 miyon dollar) lo por ta di actividadnan di pago y e resto di labor domestico.
Den caso cu tur di nan uni pa e welga, convoca pa awe 9 di maart, e impacto den sector agricola y industrial lo por ta poco, pa motibo cu poco hende muhe tin empleo den area aki.
“Sinembargo, sector di servicio lo perde cerca di 50% di trahadonan. Esaki lo por afecta servicio como financiero, comercial, educacion of transporte, Yadira Rodríguez, economista di Universidad Nacional Autonomo di Mexico a splica.
Despues di e feminicidio reciente cu a sucede na Ciudad di Mexico como esun di Ingrid Escamilla (ken a ser asesina y soya pa su pareha) y esun di e mucha muhe Fatima, ken su curpa a ser haya den un saco di sushi, agrupacionnan feminista na Mexico a convoca un welga nacional di hende muhe.
Di acuerdo cu dato di Secretariado Ehecutivo di Sistema Nacional di Siguridad Publico (SESNSP), na Mexico a registra 980 feminicidio durante aña 2019, un promedio di 10 asesinato pa dia pa cuestion di genero.
