Departamento di Enseñansa: ‘Evaluacion ta importante prome cu scoge bo carera’

Departamento di Enseñansa ta anuncia na tur hoben cu tin pensa di sigui nan estudio den exterior of na Aruba mes, pa aplica pa nan Arubalening. Aki nan ta splica e proceso di registracion.

Rosalinda Croes di departamento di Enseñansa a splica cu ainda studiante tin oportunidad di registra pa un Arubalening. Esey ta e prome stap pa bin na remarca pa financiamento pa 2021.

Esnan cu ta preparando pa e aña escolar nobo, for di aña pasa nan a caba y registra pa despues entrega nan prome documento. Croes a duna di conoce cu varios estudiante a hacie caba.

Sinembargo nan a ripara cu tin studiante cu no ta compronde of no ta check bon con e proceso mester tuma luga. Esey ta pone cu nan ta haya consecuencia di no por sigui cu e proceso, mirando cu ta wardando un e-mail di confirmacion di e registracion for di aña pasa.

Croes ta bisa cu ‘dentro di 5 dia nan ta haya e-mail’ pero hopi di e-mail ta bay den junk of spam. Pa e motibo aki e studiante ta keda warda pa haya e-mail, pero no ta check den junk anto nan no ta tuma contacto cu departamento y nan no por sigui.

“E duda ta drenta, pa e motibo aki ta sugeri pa busca den junk y spam. Si e no ta aden, e ora ey por tuma contacto cu departamento pa por guia y sigui cu e proceso, pa asina e parti online no keda stanca”, Croes ta bisa.

Actualmente nan ta traha cu Facebook, e-mail y website. Tambe ta preferibel pa duna e guia cu e studiante tin mester via telefon, of personalmente, y na e departamento tin computer cu ta haci posibel pa realisa tur cos necesario pa e proceso eynan mes.

Tin espacio ainda pa persona por solicita. Ta enfatisa si pa cada studiante tuma nota cu si e-mail no a drenta den dos dia, nan por yama of pasa personalmente di biaha. Pasobra pa e registracion mester haya e-mail.

A puntra Croes cuanto aplicacion nan a haya pa e aña aki. El a contesta cu no tin cifra, pero ta ricibi basta aplicacion. No tin un bista pa motibo cu studiante ta warda si e ta caba si of no, ‘pues si e ta slaag’.

Sinembargo nan ta sugeri pa e persona no warda pa caba pa yena e proceso di Arubalening pasobra tin un deadline. Pa fin di luna nan ta bay duna dos siman extra pa yena nan formulario digital ‘te mediado di april por aplica’.

Tin un obligacion mara na un deadline, pa dia 10 di juli mester entrega tur diploma, certificado cu nan ta bayendo. Mester registra cu scol, regla cuenta di banco, unda nan mester biba y tur cos.

Nan ta conseha pa studiante cuminsa busca/ registra pa busca un cas pa biba for di november. Pues awo ta den situacion unda ta den nan miho interes pa nan momento cu nan no haya contesta den dos dia, pa check junk of spam mail ‘algo cu por pasa’.

Te ainda persona por pasa na edificio di ex-Codemnsa. Nan ta bay muda pa edificio di John F. Kennedy. Pa dia 2 di april nan ta cuminsa atende publico bek na edificio nobo. E registracion ta pa crea un account pa haya un termino di pago, cu mester keda upload documento pa sigui cu e proceso.

Nan ta prefera pa e studiante, mirando cu nan ta bayendo afo, cu nan ta bay biba riba nan mes, tin cu cuminsa ta mas independiente, pa nan por tin e guia prome cu bay afo pa no keda stanca.

Croes tambe a duna di conoce a haya e bon noticia for di januari 2020, e interes ta 0%. “Si e studiante ta fia 100.000 florin ta esey tin cu paga. “Esey ta pasa pa nul procent, esey tin compromiso pa paga bek aki 20 aña. Esey ta conta pa tur hende. Pa esnan cu a studia caba y ta pagando 5 of pa 10 aña caba, pa e resto di locual e tin cu paga e ta bira rente vrij.”

El a expresa cu ta un alivio pa hopi hende y cu esaki ta pa keda stimula e studiante. E lening aki ta conta tambe pa IPA, Universidad di Aruba, pa tur persona cu ta aplica pa e lening. Pa esnan cu stop cu lening y ta djis sigui cu DUO, nan lo mester djis paga pa locual nan fia sin interes.

Nan ta recomenda pa studiante check website ‘studiekeuze123.nl’. Eyriba e studiante por tin un miho bista di kico nan kier studia. Croes ta duna di conoce cu scol di Hulanda ta exigi nan studiante pa haci esey, pa check cua ta nan interes specifico, cua carera nan kier sigui y nan por tin un miho bista.

Pa esnan cu ta bay otro pais, nan ta duna Arubalening pa tanto aña. Un estudio ta dura 4 aña, Nan ta conseha pa no keda cambia di carera, tambe ta conseha pa pensa bon y busca suficiente informacion pa locual nan kier bira of practica den nan futuro profesional.

Nan por busca wak si tin trabou na Aruba despues, esey ta importante. “Evaluacion ta importante prome cu haci un escogencia pa un estudio”, Croes a bisa.