Den bario musulman di ciudad di Nanchang, un fabrica Chines ta traha pantaya di computer, camara y scanner di fingerprint pa un proveedor na gigantenan tecnologico internacional manera Apple y Lenovo. Sinembargo, mayoria di Uighur cu ta traha den e fabrica ta isola den un compleho fortifica cu camara di siguridad y guardianan na entrada.
Ora nan sali ta cu chaperon, nan no mag adora ni tapa nan cabes, y mester atende les special anochi, segun trahadonan actual y anterior, y doñonan di negoshi den e area.
E conexion entre OFILM, e proveedor doño di e fabrica na Nanchang, y e gigantenan tecnologico ta e señal mas recien cu companianan pafo di China ta beneficia di practicanan di labor forsa imponi riba Uighurnan, un grupo etnico Turco, y otro minorianan.
Durante ultimo cuatro aña, gobierno Chines a detene mas di un miyon persona di e region Xinjiang, mayoria Uighur, den campo di detencion y prison unda nan ta pasa den re-educacion forsa ideologico y di comportamento. China pa largo ta sospecha cu e Uighur tin tendencia separatista pa motibo di nan cultura, lenguahe y religion distinto.
Documentonan ta mustra cu ora detenidonan ‘gradua’ di e campamento, ta manda hopi di nan traha den fabricanan. Mayoria a ser manda forsa, maske den algun caso no ta cla si nan a duna permiso.
Na fabrica OFILM, Uighur ta ricibi pago igual na otro trahadonan pero ta ser trata diferente, segun residentenan di e bario. No ta permiti nan pa sali of resa – a diferencia di migrantenan Hui musulman tambe trahando eynan, kende ta ser considera menos menasante pa gobierno Chines. “Si bo ta Uighur, bo mag sali apenas dos biaha pa luna”, segun un informante kende AP no a revela su identidad pa proteg’e di posibel retribucion.
Gobierno Chines ta bisa cu e programa di labor ta un forma pa train Uighur y otro minorianan y duna nan trabou. Sinembargo, expertonan ta bisa cu e programa ta parti di un accion mas grandi contra cultura Uighur, kibrando lasonan social y familiar door di manda hende leu di nan cas pa nan ser asimila den e cultura dominante Han Chines.
Website di OFILM ta indica cu trahadonan na Xinjiang ta traha screen, lens di camara y scanner di fingerprint. E ta gaba clientenan manera Apple, Samsung, Lenovo, Dell, HP, LG y Huawei, maske AP no a logra track productonan specifico na companianan specifico.
Apple su lista mas recien di proveedor, publica januari aña pasa, ta inclui tres fabrica OFILM na Nanchang. No ta cla cua di nan ta esun cu AP a bishita, y Apple a nenga repetidamente di clarifica cua fabrica ta usa.
Lenovo a confirma cu ta cumpra screen, camara y scanner di OFILM, pero a bisa cu no tabata na altura di e acusacion y lo investiga. Ademas Lenovo a nota cu un auditoria di Reliable Business Alliance na 2018 a duna OFILM un bon score.
Tur compania cu a responde a bisa cu nan ta rekeri proveedonan pa cumpli cu standard laboral estricto.
OFILM tambe ta lista como cliente un decena di compania dentro di China, como tambe companianan cu ta yama ‘partner’ sin specifica ki producto ta ofrece. Y ta suministra PAR Technology, un bendedo Mericano di systema di benta na ken mas recientemente a manda 48 carton di touch screen na februari.
Website di OFILM ta bisa cu e compania a ‘contesta un yamado di gobierno’ y a bay Xinjiang pa recluta minorianan como parti di un esfuerso pa ranca nan for di pobresa y yuda nan ‘studia y mehora’. A recluta mas di 3mil homber y muhe jong for di Xinjiang cuminsando na 2017. Un reporte di Australian Strategic Policy Institute a calcula cu mas di 80mil Uighur a ser transferi di Xinjiang na fabricanan rond China entre 2017 y 2019. A haya ‘condicionnan cu ta sugeri fuertemente labor forsa’ consistente cu definicion di ILO.
