Ayera mainta gobierno por medio di su departamento di Asunto Economico a reintroduci un add di control di prijs. Nan ta reintroduci’e, ya cu esun cu nan a introduci na aña 2018 tabatin problema pa acopla e add na e sistema Android.
Pa minister encarga cu e cartera aki, Xiomara Maduro, e add aki ta bira un instrumento importante y di acceso facil via un smartphone pa empodera e mesun consumidor riba control di prijs di e productonan protegi cu prijs maximo y cu ta cay den e canasta basico.
Pero tambe e usuario ta haya informacion riba prijs di productonan petrolero y prijs di gas pa consumo domestico. Hopi biaha e consumido no sa cuanto e prijs ta, ya sea cu e prijs no ta poni of e ta poni den diferente forma. Pero via e app aki lo facilita e control di prijs aki.
Di e forma aki e ta haya cu nan ta cumpliendo cu e tarea di e cartera di asunto economico, mirando cu e consumido tin un instrumento al alcance di su man pa wak si loke e ta pagando riba e productonan di e canasta basico ta cumpli cu regla. E ta invita tur consumido pa ban haci uzo di e app aki totalmente gratis via google play pa android devoces of app store pa I-phone.
El a menciona cu den locual ta e prijsnan poni ariba e app ta inclui e BBO caba. Por ehempel e add aki tin e prijs maximo pa loke ta webo, pan blanco y macutu di compras. El a bisa cu e ‘macutu di compras’ tambe ta otro instrumento importante caminda departamento economico ta haci un comparacion di 10 diferente supermercado y 25 productonan. Nan ta compara e prijs nan di aki y mustra e consumido unda e producto aki ta mas barata. Nan no ta producto protegi cu ta cay bou di producto basico, sino cu nan tin prijs liber. Esaki ta brinda bo e facilidad pa compara prijs di productonan na diferente supermercado pa libremente e consumido por haci su escogencia sabi.
Pero e ta haya cu pa e mesun gremio comercial e app aki ta un instrumento importante, ya cu e tin informacion valioso den dje. Durante e reintroduccion di e app aki un funcionario di e departamento di asunto Economico, sra. Maduro a mustra brevemente riba e funcionalidad di e aplicacion aki.
