Ministerio di Salud Colombiano a eleva pa halto e riesgo di e yegada di corovirus na e pais despues di conoce mas caso confirma na paisnan bisiña como Ecuador, unda ya a registra caba shete persona contagia; Mexico a reporta cinco, Brasil, dos pashent y Republica Dominicana cu un caso confirma.
Di acuerdo cu e organismo estatal, e situacion aki ta haci cu e reporte di caso na Colombia di coronavirus por ta cerca, pa loke a duna recomendacionnan pa e personanan cu ta drenta na e pais cu ta bin for di luganan unda a detecta casonan confirma di Covid-19.
Eleva di “modera” pa “halto” e riesgo di entrada di e virus na Colombia ta implica den practica e ampliacion di control di migracion pa pasaheronan di e pais na unda e infeccion ta circula, como China, Italia, Korea, Hapon, Alemania, Spaña, Merca y Ecuador.
Ivan Dario Gonzalez, minister di Salud encarga, a afirma cu ‘e riesgo cu nos tin di importa un caso ta halto’ e pais ta prepara pa ‘conten’e’.
Pa via di esaki, Ministerio ta haci ahustacion no den aeropuerto internacional so sino trahando den man cu Migracion Colombia pa reforsa e filtro migratorio den acceso terrestre na e pais, como e brug Rumichaca cu ta comunica Colombia cu Ecuador. Esaki “no ta implica ningun tipo di restriccion pa cu comercio, transito of actividadnan normal di e frontera cu Ecuador” minister Gonzalez a bisa.
Covid-19 ta presente na 61 pais caba na nivel mundial, loke a haci cu Organisacion Mundial di Salud ( who) a aumenta pa ‘hopi halto’ e menasa internacional di e enfermedad.
