Guyana Elections Commission (GECOM), e organo central electoral di e pais, a faya den entrega un resultado final di eleccion teni dialuna pasa, loke a causa bastante preocupacion den varios sector di comunidad y a duna bida na informenan contradictorio cu ta circula tocante ken tabata victorioso.
Diaranson atardi ainda GECOM no a duna un declaracion oficial di e resultadonan di e eleccion general mientras cu si tabata sigui duna resultadonan regional. E imagen ta cu e dos coalicionnan fuerte, tanto e coalicion APNU+AFC actualmente na poder y e opositor PPP/C ta den un competencia fuerte, sin un claro vencedor na e momento aki.
Dialuna pasa e ciudadanonan di Guyana a deposita nan voto pa eleccion general y regional. Ley electoral ta prescribi cu solamente ‘Chief Election Officer’ Keith Lowenfield por declara tocante eleccion general. Na nivel di e regionnan cada hefe (‘Returning Officer’) ta rekeri pa haci un declaracion publico di e resultadonan den su hurisdiccion.
E partidonan mas chikito manera Change Guyana (CG), Liberty and Justice Party (LJP) y United Republic Party (URP) a logra haya un cantidad chikito di voto. Otronan manera A New United Guyana (ANUG) y The Citizenship Initiative (TCI) no a participa na nivel regional. Tin resultado regional conoci den region Uno, Dos, Cinco, Ocho, Nuebe y Dies. No tin resultado anuncia di region Tres y Cuatro ni di Shete. E coalicion opositor aparentemente a logra capta cuatro region, mientras cu e coalicion di gobierno a logra solamente dos, region Ocho y Dies.
