Dialuna pasa, minister di Enseñansa, Ciencia y Desaroyo Sostenibel, Armando ‘Rudy’ Lampe a trece dilanti cu diadomingo ultimo a clausura un tayer cu a uni diferente partinan di reino pa loke ta musica den scol.
Lampe a splica cu recientemente hunto cu minister di Husticia a cuminsa crea Stichting Leerorkest Aruba, cu a caba di ricibi 144 instrumento musical for di Stichting Leerorkest Amsterdam y Aruba tuma e iniciativa e ora ey pa organisa un encuentro entre Stichting Leerorkest di Corsou, di Hulanda y e fundacion encarga cu e trabou na Boneiro y Aruba.
Tur di nan a bin hunto y for di diabierna te cu diadomingo ultimo a haci e encuentro aki cu tabata positivo y exitoso.
Lampe a comenta cu e importancia di e proyecto aki, por ta cu ainda no ta mir’e. Pero nan sa cu tin cu siña e muchanan con por lucha cu un bida di stress of ansiedad, pa motibo cu tur ser humano ta confronta esey, y si un persona no tin e hermentnan necesario, e por scoge e caminda di abuso di alcohol of droga.
P’esey Lampe a expresa cu a traves di deporte, arte of musica por siña con pa maneha presion di bida. El a bisa cu a mira cu tin talento musical bou di e muchanan y hobennan, cu nan kier pa esaki bira parti di e curriculum di scol.
Na e momentonan aki, Lampe a informa cu a cuminsa cu cuatro scol piloto y esey ta bayendo ‘fastastico’. E reaccion di e muchanan y maestronan ta positivo pa loke ta incorpora musica den e plan di enseñansa, cu lo continua, Lampe a finalisa.
