Presidente di Asociacion di Comerciantenan Chines, William Cheng: Te ainda importacion di producto di China no tin efecto na Aruba

A pesar cu exportacion for di China pa henter mundo a cay pa causa di efecto di Coronavirus, na Aruba e gremio di comerciantenan Chines ta mantene nan mes positivo. Sinembargo mundialmente, ya caba a cuminsa evalua e efectonan cu e virus aki, cu a cuminsa plama den varios pais, lo tin pa comercio y economia global.

Presidente di e Asociacion di Comerciantenan Chines na Aruba, William Cheng a declara na Bon Dia Aruba cu ainda nan no ta sinti e efecto di locual ta sosode na China. Ademas nan tin producto suficiente pa sigui abastece nos consumido local, sin cu prijs ta wordo afecta. A pesar cu produccion a baha den cierto ciudad na China y cu nan exportacion a baha, tin otro ciudadnan industrial y wafnan cu ta sigui opera.

Asociacion di Comerciantenan Chines na Aruba ta agrupa y representa basicamente tur comerciante Chines riba nos isla. Nan ta representa mas cu 200 supermercado y alrededor di 60 restaurant, sin conta e negoshinan di hardware y laundry.

Situacion.
El a bisa cu e importacion di productonan for di China pa Aruba no ta wordo afecta. Cheng a bisa cu gran parti di e productonan ya sea cuminda di bleki of seco, y tambe material di construccion no ta bin di Wuhan of areanan cercano. Willem Cheng a aclaria cu mayoria di producto alimenticio cu Aruba ta importa ta bin for di Merca, Hulanda y tambe for di nos region, entre otro Republica Dominicana, Colombia, Brasil y Argentina.

Segun data di Oficina Central di Estadistica (CBS), mayoria di productonan cu nos ta importa ta bin for di Merca. E pais aki ta abastece nos pais cu un 64% di e productonan total cu nos ta importa. Pero China tambe ta un fuente importante cu ta abastece nos cu tur sorto di productonan, considerando tambe cu un gran mayoria di nos supermercadonan ta den man di e comunidad Chines.

For di 2017 te cu luna di september 2019, Aruba a importa directamente for di China productonan pa balor total di 166’880.000 florin. E cifra aki di importacion total for di China ta referi na tur importacion cu ta drenta e teritorio economico di Aruba, incluyendo Free Zone.

Mayoria di e productonan cu ta wordo exporta di China pa Aruba ta bin di Canton cu ta hopi leu di Wuhan. Cheng a bisa cu na Canton tin masha poco caso di Coronavirus, a pesar cu e ta un ciudad cu un poblacion grandi. Igualmente mayoria di e productonan ta wordo produci den e ciudad industrial di Shanghai. Debi na e celebracion di Aña Chines, tabatin un vakantie largo di casi dos siman, pero e hendenan a cuminsa traha bek, a pesar di e restriccion cu tin debi na e Coronavirus.

El a bisa cu gobierno di China a bin cu medidanan hopi pisa pa contraresta e virus aki. Di un banda gobierno di China a haci su maximo esfuerso pa contene e virus. Y awor nan ta buscado un solucion permanente pa trece normalidad bek. Ademas cierto industria cu ta esencial pa nan economia y tambe pa nan comunidad ta esunnan cu ta hayando prioridad pa nan por haya movecion. Ya cu nan mester di nan exportacion pa no afecta nan sector financiero.

Coronavirus.
Mayoria di casonan ta wordo registra den cierto ciudadnan di e estado di Hubei, caminda Wuhan ta situa. Wuhan ta e epicentro di e Coronavirus, unda e prome casonan a presenta na final di luna di december ultimo.

“Gobierno di China no kier pa e virus aki plama den henter China y tampoco den henter mundo, y nan a cera full e ciudad pa tin miho control,” el a bisa. Cheng a indica cu e control aki a haci cu cantidad di pashent cu a haya e virus a cuminsa sali for di hospital, ya cu nan a cura y nan a bay cas.

Ta asina cu ministerio di Salud di China a confirma cu te diasabra ultimo 2.835 persona a muri pa causa di e brote di e Coronavirus, ya cu alrededor di 79.251 persona a resulta contagia. E casonan nobo a cuminsa baha, mientras cu e pashentnan cu a bira salud ta cuminsa subi. Te diabierna ultimo 39.002 persona a sali for di diferente hospital despues cu nan a recupera for di e Coronavirus.