Por lo menos 10 persona a muri den oranan di marduga ayera y otronan a desaparece na sur di estado di Sao Paulo pa via di yobidanan fuerte, autoridadnan a informa.
E awaseronan a cuminsa dialuna anochi. E districto di Santos, San Vicente y Guaruja, na costa sur di estado, a sufri inundacionnan, teranan los y interupcion di servicio.
A pesar di e importancia economico di Santos, cu tin e waf mayor di Latino America, e ciudad ta conta cu un cantidad halto di viviendanan pober.
Un di e fayecidonan ta un bombero cu tabata dunando servicio.
Autoridadnan a registra mas di 70 yamada di ayudo, y varios persona a ser rescata.
Gobernador di estado, Joao Doria, a expresa su condolencia a traves di rednan social. “Mi solidaridad cu e habitantenan di Baixada Santista (area metropolitano di Santos) cu ta sufri e yobidanan fuerte desde ayera”, Doria a skirbi.
Algun autopista cu ta conecta e ciudad cu e capital Sao Paulo ta cera y otro a keda blokea pa palonan cu a cay y terenonan cu a los.
Di otro banda, e bisiña estado Rio de Janerio, unda e awaseronan a causa fayecimento di cinco persona y dañonan material na inicio di siman, e yobidanan ta sigui y autoridadnan ta mantene vigilancia, aunke a kita e estado di alerta.
Brasil ta bibando un berano poco normal cu un volumen halto di yobidanan den e region. Na januari mas di 50 persona a fayece na Minas Gerais, estado bisiña di Sao Paulo na unda a biba varios dia di yobidanan intenso.
