Consul Dominicano na Aruba, Comprés Rosario: Accion di protesta ta mustra un mal imagen pafo di nan pais

E decision cu gobierno Dominicano bou presidencia di Lic. Danilo Medina a tuma di suspende e eleccion municipal dia 16 di februari ultimo, debi cu hunta electoral a informa cu e mashinnan di votacion a faya, a crea un ambiente di protesta paden y pafo di Republica Dominicana, entre nan na Aruba mes.

Na final di e acto protocolario pa conmemora e dia di independencia di Republica Dominicana, Bon Dia Aruba a puntra Consul Dominicano na Aruba, Victor Marcelino Comprés Rosario riba e situacion aki. E diplomatico ta haya cu e tipo di accion di protesta aki ta mustra un mal imagen pafo di nan pais, y tambe pa nan propio hendenan Dominicano. El a bisa cu na nivel di gobierno nan ta na fabor di un investigacion cu por aclaria henter e asunto aki.

“Nos ta bisa na nivel di gobierno cu mester bin un investigacion,” el a declara na e matutino aki.

Comprés Rosario a indica cu pa trece claridad rond di e asunto aki su gobierno a pidi Organisacion di Estado Americano (OEA) y otro instancia tambe, pa nan realisa un investiga na Republica Dominicano riba kico a sosode berdaderamente. Ya cu nan mester sa for di unda a surgi e situacion aki tan ‘bochornoso’.

Consul Comprés Rosario a declara cu logicamente e sector di oposicion ta acusa su gobierno di e problema cu a surgi durante e eleccion municipal. E ta compronde cu loke generalmente ta wordo pensa ta cu gobierno ta esun responsabel di haci e tipo di cos aki. “Pero nos ta sigur cu nos no tabatin mester y tampoco nos no tin’e di haci e cos aki,” el a bisa.

E diplomatico a agrega cu e partido di gobierno ta un partido fuerte. Ademas tabatin pronostico prome cu eleccion a wordo suspendi cu tabata mustra cu nan tabatin e eleccion gana.

El a splica cu nan tin un metodo independiente for di e Hunta Electoral Dominicano cu ta facilita pa nan por hiba un registro y control di esunnan cu a bay vota na fabor di nan candidatonan a base di e plataforma logistico cu nan tin. Tur e datonan emiti pa nan delegadonan for di e mesun sitionan di votacion cu ta wordo compila den nan sistema general yama como “360” na Sto. Domingo.

“Esey ta un proceso cientifico cu tur partido ta hacie,” el a argumenta. Te hasta el a indica cu e partido cu antes tabata sostene presidente Medina, nan sa tambe con e proyeccion di contamento di voto ta wordo haci durante eleccion, pues e no ta nada nobo. Pasobra nan a bandona e coalicion politico aki apenas un par di luna atras.

E ta lamenta cu e sector politico di oposicion ta acusa e partido di gobierno cu nan ta hinca nan man den e resultado di eleccion. Ya cu nan a yega di gana cantidad di eleccion cu e mesun metodo cu den pasado e partido cu awor ta protesta tabata participa di dje.