Buscando tur forma pa laba man di loke el a haci, Parlamentario Rocco Tjon a purba di usa un caso sumario contra di Parlamentario Benny Sevinger, pa trata di limpia un parti scur di su bida.

Melvin Tromp di partido AVP a reaccion riba decision di Corte den Prome Instancia, cu a dicidi cu no tin motibo pa exigi Sevinger rectifica declaracionnan cu el a haci den direccion di Rocco, relaciona cu loke tabata bay rond ria Tjon pa loke un caso di pedofilia.

Ningun momento Corte a dicidi cu Tjon ta inocente di cierto acusacionnan cu ta bay rond relaciona cu su yiu muhe pero solamente a bisa cu parlamentario Sevinger no a presenta ningun prueba di loke el a trece dilanti.

“Ta impresionante con Tjon ta buscando unda cu ta pa gara na dje pa tapa algo cu su persona ta bon na altura a sosode y cu a crea situacionnan delicado pa esunnan envolvi.

Na varios ocasion mi persona a reta Rocco pa bin dilanti y aclaria e caso aki cu a sosode cu su persona y cu a pone cu el a wordo prohibi di tin contacto cu su yiu muhe pero nunca el a haci esaki y nunca el a desmenti algo cu a wordo treci dilanti contra su persona.

Anteriormente prome cu Parlamentario Sevinger a haci su declaracionnan den un conferencia di prensa, varios luna anterior mi persona na mas cu un ocasion a trece informacionnan fidedigno dilanti sin nunca cu Tjon a acepta e reto pa bisa cu e cosnan aki no ta cuadra cu berdad.

Ta asuntonan serio pero mientras cu na varios ocasion su persona kier papia na varios ocasion riba integridad di hende, su persona mes no ta cumpli cu esaki dor di bin dilanti y admiti loke el a haci den e forma corecto.

Pa colmo Tjon ta bay usa otro colega parlamentario, kende tambe tin un reputacion dudoso y kende a haya su mes envolvi cu husticia y a wordo retira pa motibo di fraude cometi como presidente di fundacion Lotto pa Deporte, mustrando un biaha mas su falta di seriedad pa cu e caso serio aki.

Lo ta bon tambe pa sr Tjon confirma si e ta na altura cu hasta un carta a wordo dirigi na Gobernador di Aruba, caminda e mucha ta pidi permiso pa e no carga fam di su tata mas, ya cu ta informacion ricibi di hendenan cu ta hopi yega na e caso aki.

Ta cosnan cu ta dificil pa sconde, ta dolornan grandi cu el a pone hende pasa aden y no ta cosnan cu no por simplemente tapa ya cu tin hende inocente envolvi den e caso aki pero Tjon si ta kere cu e por sigui cu su bida normal mescos cu nada a pasa.

No solamente Tjon a faya caba cu su propio sanger pero e ta bayendo como representante di pueblo cu no ta luchando pa pueblo, cu no ta para pa interes di pueblo y cu mescos cu henter su fraccion, no ta luchando pa sirbi interes di pueblo.

Un set di representantenan di pueblo cu ta sirbi interes di gobierno riba interes di pueblo ya cu ningun ta saca un man pa presiona gobierno pa yuda pueblo den su necesidadnan,

Cantidad di promesa a wordo haci sin cu nan a wordo cumpli y pueblo tin un gobierno su dilanti cu solamente tin un solo solucion pa tur cos, cual ta medida y mas medida y na luga cu Tjon y su coleganan lanta para pa pueblo, awor ta cla pa bolbe sacudi cabes y bisa si y pro mas medida contra interes di pueblo,” Melvin Tromp di AVP a declara.