Ayera mainta, minister di Enseñansa, Ciencia y Desaroyo Sostenibel, Armando ‘Rudy’ Lampe a ofrece un conferencia di prensa pa duna di conoce e proyecto di implementacion di sistema di enseñansa Montessori den scol publico.
Na cuminsamento di e conferencia di prensa, separadamente Lampe a anuncia un plan preventivo cu lo sali for di Ministerio di Salubridad Publico pa scolnan keda bon prepara pa e menasa cu tin di coronavirus na nivel mundial.
Den dianan aki lo haci publico e plan di parti di e ministerio y esunnan special riba e tema aki, pa motibo cu tin cu pone den mesun linea tur scol den un plan preventivo.
Den otro topico, Lampe a trece dilanti cu siman pasa un delegacion di Hulanda a bin Aruba pa trata loke ta ‘Montessori Scol’. Diabierna ultimo nan a clausura un training di e maestronan cu ta bay wordo certifica como maestro Montessori.
Di esaki, el señala cu e motibo ta cu nan kier cuminsa na Colegio Hilario Angela na San Nicolas cu e prome scol publico basa riba filosofia Montessori. Lampe a splica cu den e actual sistema di enseñansa tin muchanan cu no ta caba cu diploma y esey no por sigui. “Nos tin cu trece cierto cambio, cu ta haci cu e sistema Montessori ta bay funciona pa un grupo di muchanan, cu por ta cu nan no ta haya tur estimulo pa nan talento y desaroyo emocional”, Lampe a sigura.
Pa e motibo aki, el a señala cu tin hopi expectativa di e cambio aki, unda cu Montessori scol ta cuminsa drenta Aruba tambe y e ta bira un opcion pa mayornan y cierto muchanan, cu lo por desaroya nan mes grandemente den e sistema aki.
Esaki tambe a ser splica den un anochi informativo pa mayornan di e scol aki, hunto cu e profesor di Hulanda ken a duna informacion riba kico ta e diferencia entre e sistema tradicional di enseñansa y e sistema Montessori, cu lo cuminsa na augustus.
Lampe a expresa cu nan lo duna cierto apoyo pa un scol priva Montessori cu yama Fundacion Nos Fortalesa ubica na Dakota. El a bisa cu a pone un edificio disponibel, a trece hunto e kleuter y e prome onderwijs Montessori den dje. Tambe a pone algun maestro cu tin e conocemento disponibel pa yuda. Asina mes, a trece material educativo di segunda mano di Montessori di Hulanda, cual segun e mandatario mes a sigura, ta trata di material costoso.
A transporta e material pa e scol na Dakota hunto cu apoyo di gobierno pa por haci e scol no solamente sostenibel, sino tambe a largo plaso y no lo bira impagabel pa mayornan.
Na e momentonan aki, nan lo cuminsa cu un scol so cu ta na San Nicolas, pa motibo cu e ekipo di eynan a adopta e filosofia Montessori y a haya e training cu lo continua durante vakantie grandi, pa asina por cuminsa cu kleuter y prome enseñansa Montessori.
Finalmente, el a bisa cu lo evalua con e scol aki ta bay, si tin mas demanda y sin tin mas recursonan financiero pa por sigui.
