Diabierna pasa, 28 di februari 2020, Refineria di Aruba NV y Citgo a firma un ‘transfer agreement’ unda cu Citgo ta transferi e operacion di e refineria y terminal pa RdA. E transferencia a tuma lugar diasabra atardi, 29 di februari 2020, durante un ceremeonia cortico dilanti entrada di e compleho, unda representante di Citgo Joe Crawford a haci entrega di yabi di e refineria na Reynolds Arends, di RdA.  

 

Segun e comunicado di prensa emiti pa gobierno, esaki lo ta e prome paso den e proceso pa, den un forma amical, termina e acuerdonan entre Citgo y RdA cu Gobierno. “E terminacion a bira necesario na momento cu a bira claro cu Citgo no por cumpli cu su obligacionnan mas pa motibo di sancionnan imponi pa gobierno Mericano.” Tambe gobierno ta anuncia cu pronto lo presenta un proyecto di ley na Parlamento, cu lo trata terminacion di e contratonan. Despues di esey lo cuminsa e proceso pa busca otro operador pa e terminal di crudo y refineria.

 

Pa prome biaha den historia, Pais Aruba, a traves di RdA y e compania Terminal di Energia Aruba NV (TDEA), funda recientemente, ambos compania estatal, lo opera e transshipment terminal temporalmente. RdA/TDEA lo ta encarga tambe cu preservacion di e refineria, mientras cu gobierno lo cuminsa e proceso pa busca un inversionista/operador nobo pa esaki.

 

Gobierno di Aruba a informa Parlamento di e desaroyo aki imediatamente diasabra atardi, y despues a invita prensa pa presencia e traspaso na gate di e refineria. E traspaso a tuma lugar den un ceremonia sobrio, ya cu segun gobierno esaki no ta e terminacion di e contrato cu Citgo ainda; por efectua e terminacion despues di aprobacion di Parlamento.

Despues di e rueda di prensa Bon Dia Aruba tabatin oportunidad pa intercambia algun palabra cu Prome minister Wever-Croes, unda el a expresa su satisfaccion cu a yega na e punto aki di traspaso di yabi, pero ta expresa su preocupacion pa e condicion di e instalacionnan. Segun e mandatario, lo mester duna prioridad actualmente na mantenimento atrasa, pa percura cu e facilidadnan portuario y demas infrastructura ta den condicion pa garantisa yegada y almacenahe di combustible, pa suministro di entre otro gasolin y diesel. Igualmente e terminal di crudo mester di inversion pa por garantisa su operacion.

Tambe el a declara cu tin un ekipo forma caba pa e prome trabaonan, entre nan varios persona cu tabata empleado di Citgo pa e mesun trabao aki.