Dolor financiero ta profundisa mientras 60 pais ta reporta caso di virus

Un crisis di salud ta cada bes mas profundo tambe a bira problema economico ayera, cu e borte di e virus debilitando mercado financiero, lagando tienda y negoshi bashi, y poniendo sitionan y eventonan mayor fuera di alcance.

Na medida cu e lista di pais afecta pa e malesa ta yega 60 cu Mexico, Belarus, Lithuania, New Zealand, Nigeria, Azerbaijan y Hulanda informando nan prome caso, e menasa riba economia a bira mesun grandi cu e menasa pa bida.

“No ta colera of plaga preto. E daño cu mas ta preocupa nos ta na economia”, segun Simone Venturini, consehero di desaroyo economico di ciudad di Venecia, Italia unda turismo afecta pa inundacion historico di aña pasa a keda sink cu noticia di casonan di virus.

Tedros Adhanom Ghebreyesus, director general di Organisacion Mundial di Salud (WHO), a bisa cu e brote ‘tin potencial pandemico’ pero cualkier terminologia usa pa oficialnan, e efecto ta cla.

Atraccion manera Tokyo Disneyland y Unverisal Studios Japan a anuncia cu clausura y evento cu tabata spera decena di miles di persona, incluyendo un tour di grupo megapopular di K-pop, BTS, a keda suspendi.

Na Italia, unda e conteo di 650 caso ta aumentando, reservacion di hotel ta reduciendo y premier Giuseppe Conte a referi na posibel recesion.

Scol na Hapon a prepara pa cera y isla Hokkaido a declara un estado di emergencia, cu su gobernador insistiendo pa residente keda cas durante fin di siman.

Na nivel mundial, mas di 83.000 persona a bira malo cu coronavirus. China, aunke esun mas afecta, a mira cantidad menor di infeccion nobo, cu 327 caso adicional reporta, elevando e total na e pais pa 78.824. Otro 44 persona a muri pa un total di 2.788.

Sur Corea a registra 2.337 caso, e mayor cantidad pafo di China. Cluster emergente na Italia y Iran, unda tin 34 morto y 388 caso, na mesun momento a conduci na infeccion di persona na otro pais. Francia y Alemania tambe a experimenta aumento, cu decenas di infeccion.