Carnaval a bin y bay… Awor back to normal…

Carnaval 2020 a pasa pa historia den un suspiro, y pa e fanaticonan awe ya nan ta den e fase di preparacion pa otro aña. Nada straño den esey, tur parti di mundo esey ta e manera di traha. Importante ta si pa haci esey a base di un bon analisis di con carnaval di e aña aki a bay. Sin cu nos ta pretende di ta completo den loke nos a mira, algun punto pa reflexiona.

Por a observa cu e participacion den e gruponan mes, un mas cu otro, tabata bon y e gruponan a luci un abundancia di color, cu a laga poco di desea. Cu un duracion di tres ora, na unda nos a observa, esey ta duna suficiente pa un bon evento. Sin embargo, nos por mira cu e porcentahe di truck di asistencia den e parada ta cubri un porcentahe halto di e total, segun nos cerca di 40% di e total. Den nos humilde opinion, esey ta kita resplandor di e beyesa di e gruponan mes, sigur si ta trata di hopi truck sin ningun adorno. Di e manera aki nan no ta contribui na bunitesa di e totalidad y lo ta recomendable pa busca un alternativa pa esaki. Nos por mira cu hasta toilet a bira parti integral di e parada, aunke mester bisa cu hopi a tuma e esfuerso pa dorna y camufla esaki. No tin otro solucion, manera toilet na banda cada tanto metro, den un area cera, no accesible pa publico? Djis un sugerencia.

Tambe nos por a observa cu banda di caminda, tanto na San Nicolas como na Playa, e aglomeracion di mirones tabata definitivamente menos. Tambe cu e parada di mucha na San Nicolas tabatin hopi menos participacion compara cu aña pasa. Nos no kier ‘rush to conclusions’ tocante e asunto, pasobra nos no sa trasfondo di esaki, pero lo ta bon pa analisa e fenomenonan aki. Mientras di antemano nos a tende bastante comentario cu e situacion economico pa hopi hende lo refleha negativamente den carnaval, pa loke ta e participacion den e gruponan y e esfuerso – tambe financiero – den esey, nos no por a mira un retroceso. En todo caso, por bisa cu carnaval ta bibo, cu hopi musica excitante y bon ambiente, aunke por tin otro opinion tocante esey. Last but not least, nos aprecio pa e forma diligente y eficaz cu nos servicionan publico ta percura pa remove baricada y sushedad inmediatamente for di e ruta. Un bon ehemplo pa gobernacion den su otro tareanan tambe ta mustra algo di e diligencia aki? Aparentemente por…

E siman aki nos ta naturalmente bolbe na e bida di tur dia, cu e problemanan individual y colectivo cu ta toca nos. Nos no lo cuminsa cu, atrobe, nos situacion financiero y presupuesto, eseynan di mes lo bin dilanti. Pero tin otro tema cu nos kier a toca. Esey ta por ehemplo e situacion na Hospital, unda ta tende señalnan positivo awor cu e director tan controversial a bay. Nos ta spera cu esey ta berdad, aunke di otro banda nos ta haya e sensacion cu ta pasando mesun cos cu na Serlimar unda e director saliente a carga cu tur e culpa. Sano huicio ta bisa nos cu esey no por ta asina, sigur no cu problema cu ta data di tanto aña pasa. Nos no ta bay cay den e trampa ey tampoco. Y pa demostra esey, algun pregunta clave: nos a comprende cu tin un rapport cla tocante e fraude cu lo a tuma luga na Laboratorio di Hospital. Nos ta spera cu di esey lo sali mas contesta cu loke nos a haya te awor. No ta trata di un caso menor, nos calculacion tempo cu nos a anuncia, a base di informacion fidedigno, tabata cu e Pap-testnan tabata costa 190 euro pa cada un y cu tabata trata di un cantidad di en todo caso riba 2.000, pa un suma di mas di 400.000 euro, cu ta casi un miyon florin. E ex director recientemente a confirma e suma y cantidad di test den un rueda di prensa, asina ta nos informacion tabata corecto. Pregunta awor: unda e Pap-testnan haci awe, ta bay? Ta procesa nan na Aruba, y na unda? Si ta asina, pakico mester a manda nan Hulanda, unda finalmente nan no a bay? Si ta procesa nan den exterior, unda nan ta bay y cuanto nan ta costa?

E otro pregunta ta, con esaki por a tuma luga, si tabatin envolvi fundacion di laboratorio, fundacion di hospital, y AZV, cu finalmente di nos placa ta paga ‘los platos rotos’… For di e investigacion lo bin resulta cu e asunto aki a pasa den man di tanto hende inteligente y cu experiencia, y ningun hende a puntra ta pakico un Pap-test, cu tabata costa anteriormente un fraccion di e suma menciona, de repente mester a costa casi 400 florin cada un? Ta asina despreocupa ta traha presupuesto den e organismonan publico aki? Nos ta spera di mira algun contesta riba e asunto aki, y tambe consecuencia hudicial pa esnan envolvi. No ta tolerable pa laga esnan cu a echa e baina aki djis subi avion y sigui nan bida otro caminda. Husticia mester ta pa tur hende… nan di.