Prome Minister, Evelyn Wever-Croes a informa cu gobierno ta spera cu na inicio di maart nan lo por trata e presupuesto 2020.
Awe nan ta pendiente di ricibi e consehonan di Raad van Advies, y nan ta spera cu mas lihe posibel nan por atende y contesta tur e recomendacionnan cu e instituto aki lo trece dilanti.
E ta admiti cu gobierno a cay laat cu e presupuesto 2020, principalmente considerando e compromiso adkiri den e protocol firma cu Hulanda. E ta spera cu esaki no lo bira un motibo pa bin cu un ‘aanwijzing’, ya cu nan ta trahando cu tur forsa riba dje.
E mandatario a indica cu aña pasa na november, ora cu e tabata na Hulanda, nan a palabra cu gobierno Hulandes pa duna gobierno di Aruba mas tempo. Di e forma aki gabinete Wever-Croes kier a evita un ‘aanwijzing’ riba e topico di presupuesto.
Igualmente ultimo biaha cu Secretario di Estado di Reino, Raymond Knops tabata na Aruba, un biaha mas premier Wever-Croes a pidi Hulanda mas espacio pa trata su presupuesto 2020.
E ta spera cu na inicio di proximo luna nan lo por trata e presupuesto 2020 den Parlamento, dunando tempo prome pa e miembronan di e diferente fraccion di nos organo legislativo por studi’e. E ta spera cu pa maart nan por cera e luna aki cu un presupuesto 2020 cu ta aproba.
