Presidente di e agencia Venezolano specialisa den encuesta Datanalisis, Luis Vicente Leon, a sigura cu actualmente riba 55% di e poblacion ta usando divisa den e transaccionnan cu nan ta haci, y cu ta anticipa cu esaki por bira 70% e aña aki ainda, asina Leon a publica den un mensahe riba Instagram.
El a indica cu al menos 38% di e poblacion tin o ta ricibi divisa di manera directo di e fuente cu ta genera esaki, manera remesa, repatriacion di placa di spaar, salario, exportacion legal y ilegal, e ultimo aki segun Leon, contrabanda, mineria, narcotrafico.
“Penetracion di dollar ta mas halto den economia priva cu den sector publico, unda ainda ta realisa sumanan grandi na bolivar y petro,” Leon ta aclara.
E ta señala cu e uso di divisa na Venezuela ta un fenomeno imparable y dificil di cambia, sin cu tin cambio dramatico den e modelo politico y economico di e pais y ta recupera confiansa den autoridadnan monetario.”
Esaki pasobra e bolivar a perde casi tur funcion basico cualnan ta intercambio, pasobra hende no kier e y tampoco por hay’e facilmente; ta imposible pa spaar na bolivar pa e perdida di valor rapido pa e hiperinflacion continuo y ademas no ta posible pa comprende valor di cos den bolivar y tampoco por valora con un negoshi ta bayendo den e moneda aki.
Esaki ta obliga hende pa busca alternativa manera divisa y oro, mientras cu gobierno ta trata di substitui e bolivar pa petro, cu e dificultad di e falta di confiansa encuanto su capacidad pa garantisa valor di e moneda ey,” Leon ta conclui, añadiendo cu segun mas hende ta usa divisa, mas hende lo sigui tambe.
