“Ami no ta cushina cu salo”, ta algo cu mi a yega di scucha hopi. Sinembargo ora puntra kico nan ta uza pa prepara e cuminda nan ta bisa: “Complete Seasoning, Maggi, Ketchup y bouilon”. Y hopi biaha un tiki di cada pa prepara saus di un cuminda. Pasobra bo ta come na cas, no kiermen cu bo ta comiendo saludabel. E realidad ta cu bo tin control riba locual cu bo ta pone den bo cuminda, pero sin e conocemento di locual ta bon y malo, bo por come mas malo na cas, cu riba caya.
Como cu salo ta presente den diferente producto, e ta importante pa lesa label. Hopi biaha salo ta aparece como sodium (natrium). Salo tin consecuencia serio pa nos salud si nos no controla e cantidad cu nos ta consumi a base diario.
Efecto salud
Si bo come mucho salo e extra awa cu ta warda den bo curpa ta subi bo presion di sanger. Pues mas salo bo come, mas bo presion di sanger ta subi. Y mas halto cu bo presion di sanger ta, mas presion e ta pone riba bo curason, riñon y celebro.
6 gram di salo (2.4 gram natrium) ta e cantidad recomenda pa no surpasa pa dia, claro cu mas abou mas miho. E cantidad aki ta inclui salo cu bo mes ta agrega na cuminda y salo cu ya ta presente den cuminda. Un cuchara di te ta un bo guia pa e cantidad maximo di salo.
Mas o menos 80% di e cantidad di salo cu nos ta consumi ta bin for di locual cu nos ta cumpra pa come y bebe. E resto di 20% ta e salo cu nos mes ta agrega na nos cuminda ora di prepara esaki, of na mesa. E ta importante pa bo sa cu di naturalesa, no tin dje tanto salo den cuminda. Mayoria ta wordo agrega pa fabricantenan pa duna e cuminda sabor entre otro. Algun fuente hopi popular cu tin salo aden ta pan, carni y keshi. Tambe mester corda riba cumindanan cu ta bin cla prepara den paki of bleki, saus, sopi y cumindanan “junkfood”. Pa e motibo aki e chens pa un persona sufri di falta di salo ta hopi chikito.
Diferente sorto di salo
Tin salo di cushina (keukenzout), salo cu natrium a wordo reemplasa pa kalium y magnesium, salo cu mas jdium den dje y tambe sin jodium. Banda di esaki tin esunnan mas puro manera “Sea Salt”, “Himalayan Salt”, Celtic salt, Hawaiian Black Volcanic Salt Salt, enfin. Un monton di nomber complica pa salo bruin, ros, cora y preto. Cu finalmente tur tin sodium, djis e cantidad presente ta varia. Mientras cu e salo ros, esta Himalayan salt ta uno hopi popular como cu e lo ta contente 84 diferente sorto di mineral. Sinembargo e cantidad di cada un di e mineralnan aki ta wordo cuestiona si berdad e ta promove un miho salud. Banda di esaki e salo tambe ta contene rastro di otro kimiconan presente den cantidad abou, cual expertonan no sa ainda si ta maligno pa wordo consumi. Kiermen ta yega un punto cu bo mester evalua si bo ta busca un salo pa 84 mineral cu tin cu bo por haya di otro cuminda tambe, of bo ta abstene di agrega salo na bo cuminda.
Sugerencia
Mi ta recomenda pa purba come mas cuminda fresco prepara cu ta posibel. Tambe pa no agrega salo den cuminda ora cu ta cushina. Uza salt free seasoning y herbs pa duna sabor. No complica bo mes cu e diferente sorto di salonan, pa no uz’e ta miho. Aki algun tip pa come menos salo:
· Pa berdura y aros cu mas sabor, uza specerij riba nan en bes di salo (na supermercado tin hopi variedad, ‘be creative’). Purba curry, conoflok, nutmeg, oregano, paprika, peper, sage, curcuma, comino, yerba di hole siboyo etc.
· Experimenta cu juice citrico, binager y diferente azeta manera di sesame.
· Evita carninan ‘smoked’ of procesa manera hotdog y beleg
· Baha man cu cumindanan den bleki, gevries, paki di mix nan, saus, dressing pa salada etc.
· Busca pa productonan cu riba e label tin para ‘sin salo’ of ‘abou na sodium’. Pone atencion cu pa un producto por marca sin sodium e producto mester contene 5 mg of menos pa cada consumo. Hopi abou na sodium kiermen e producto ta contene 35 miligram of menos, y abou na sodium ta igual na 140 miligram of menos.
· Tin productonan zoet cu tambe ta contene sodium pero esakinan ta scondi. Cu esaki mi ta referi na cereal of otro cos dushi cu no ta smaak salo, pero toch den lista di ingrediente tin hopi salo.
· Si toch bo ta come producto di bleki, hawa bonchi, tuna y vegetal bon ya cu hopi biaha nan ta preserva cu salo.
· Si bo ta bay come afo, puntra pa informacion nutricional di e menu y e productonan cu nan ta uza pa traha e cuminda. Semper wak si nan tin un opcion mas saludabel.
· Tambe, snack riba fruta cu berdura pa evita cu bo ta busca algo menos nutritivo pa come.
