Aruba Tourism Authority:Ta lansa Aruba como destinacion turistico na Mexico

Den un tour relampago di 5 dia A.T.A. ta bishitando Ciudad di Mexico City, Guadalajara y Monterey,na unda a lansa Aruba como destinacion turistico den mercado Mexicano.  Durante e tour aki team di Aruba Tourism Authority y partnernan local manera Hyatt Regency Aruba Resort, De Palm Tours, Fofoti Tours, ECO DMS, Aruba Marriott & Stellaris Casino y Aruba Airport Authority N.V. a uni forsa.

E mercado Mexicano ta uno cu un potencial grandi den demanda y capacidad di compra pa biahe di placer y tambe pa e industria MICE (Meetings, Incentives, Conferences & Events). Ademas ta proyecta un crecemento di 5% den cantidad di Mexicano cu lo biaha na 2017 compara cu 2016. Cantidad grandi di operadornan y medionan di prensa principal na Guadalajara, Mexico City y Monterey a participa na reunionnan y disfruta di  eventonan na unda informacion di nos isla y e ambiente di nos isla a wordo presenta prominentemente. A presenta tambe e compania cu lo representa Aruba na Mexico, cu ta Ad Nova Comunicacion Strategia.

Pa ‘Mision Mexico’, A.T.A. y partnernan local a topa y lo ta topa cu e top operadornan turistico, medio di prensa y aerolineanan di Mexico pa asina presenta nos isla como destinacion turistico ideal pa e mercado Mexicano y pusha pa logra obhetivonan pa e mercado aki.

E mercado di Mexico sin ningun esfuerso a genera 2000 bishitante pa Aruba na 2015. Obhetivo pa e mercado aki ta pa crece e mercado cu 25% na 2016, y cu 50% na 2017 yegando casi 5000 bishitante na 2017. Pa 2018 lo pusha pa yega cerca di 10.000 bishitante. Esaki sin vuelo nonstop for di e mercado. E ultimo aki ta un parti integral di e metanan pa Mexico y si logra esaki lo por yega te cu 15.000 bishitante na aña 2018.Metanan ta inclui tambe un enfoke specifico riba e mercado MICE (Meetings, Incentives, Conferences and Events), p’esey Aruba Convention Bureau tambe a forma parti di e mision pa Mexico.

Den e crecemento di 14% di e cantidad di turista cu Aruba a ricibi na 2015, Norte America a aumenta cu 7.3%, Sur America a crece cu 29% y Europa a aumenta cu 1%. Durante ultimo 5 aña, Aruba su participacion den e mercado Latino Americano a crece considerablemente. Na 2015 e tabata representa 36% di e mercado total, mientras cu na 2010 e tabata 18%.

Motibo pa diversifica y drenta e mercado di Mexico ta mas cu claro considerando e potencial di e mercado, pero tambe pa sigui crea un portofolio di mercadonan mas balansa, asina mitigando risiconan di dependencia riba cierto mercadonan.