Ayera mainta a ser lansa oficialmente e Plan Nacional Multi-sectoral pa Prevencion di Malesa No-contagioso, cu tin e obhetivo di trece programanan di nutricion y conscientisacion pa e comunidad di Aruba por cuminsa biba un bida mas saludabel ya cu e pais tin cifranan halto di obesidad, sobrepeso y diabetes.
Manera comunidad sa, e binimento di cumindanan no saludabel na Aruba ta un negoshi ‘hopi lucrativo’ pa motibo cu ta esun mas ‘economico’ compara cu frutanan y berduranan cu tin un costo mas halto.
Tocante esaki, minister di Salud Dangui Oduber a ofrece un declaracion na Bon Dia Aruba pa splica cu ‘tin di mas fast food caba na Aruba’ y p’esey Gobierno ta evalua pa bin cu un moratorio pa minimalisa mercado y supermercadonan Chines asina como tambe nan ta evaluando pa bin cu un moratorio pa loke ta trata negoshinan di fast food economico.
Oduber a splica cu pa motibo di e costo di frutanan y berdura nan a pone tarifa di importacion na 0% loke ta nifica cu nan no ta paga impuesto, pero Aruba ta keda un pais cu ta depende di importacion, un parti chikito so ta wordo planta.
Pa e motibo aki, Oduber a señala cu nan kier bin cu incentivonan pa plantacion na Aruba, pa asina hopi di e frutanan lo wordo planta na Aruba mes y esaki lo yuda baha e costo y pa ta mas accesibel pa e comunidad por hiba un bida mas saludabel.
Manera a keda conoci, Aruba tin un cifra di 80% di poblacion cu sobrepeso y 30% cu tin obesidad.
