No mester existi panico economico pa Coronavirus: Ainda importacion limita di productonan Chines no mester influencia prijs

Importacion mundial for di China a baha debi na e medida di control y restriccion cu ta existi contra Coronavirus den e pais Asiatico aki. Pero tambe e emergencia sanitario declara pa Organisacion Mundial di Salud (WHO) relaciona cu e Coronavirus ta crea un barera di exportacion pa empresanan Chines.

For di dia 10 di februari ultimo, decision adopta pa gobierno Chines a conduci cu e pais aki, di unda Aruba tambe ta importa productonan comestibel y no comestibel, a baha su actividad industrial y logistico. Esaki despues cu e Coronavirus a obliga gobierno Chino pa bin cu medidanan estricto di control di salubridad publico pa evita cu e virus COVID-19 por ocasiona mas victima. Te ayera 1.110 morto a keda registra na China y 44.200 persona ta contagia, mientras cu e cifra di victimanan nobo ta sigui aumenta.

Importacion for di China.
Segun data di Oficina Central di Estadistica (CBS), mayoria di productonan cu nos ta importa ta bin for di Merca. E pais aki ta abastece nos cu un 64% di e productonan total cu nos ta importa pa nos consumido local. Pero China tambe ta un fuente importante cu ta abastece nos cu tur sorto di producto, considerando tambe cu un gran mayoria di nos supermercadonan ta supermercado Chines.

For di 2017 te cu luna di september 2019, Aruba a importa un total di 166,880.000 florin. E cifra aki di importacion total for di China ta referi na tur importacion cu ta drenta e teritorio economico di Aruba, incluyendo Free Zone.

Igualmente e ta referi exclusivamente na importacion cu a sali directamente for di China pa Aruba. E ta e opcion di ‘land van herkomst’ cu ta e ultimo pais cu e producto a sali pa drenta Aruba. Pero tambe ta existi e opcion ‘land van Oorsprong’ cual ta e pais prome cu e ultimo salida pa Aruba. Nan ta productonan cu a sali for di China y ta yega por ehempel na Panama, prome cu e ta yega Aruba.

Esaki ta haci cu considerando e ‘land van Oorsprong,’ lo por añadi mas o menos 10 pa 17 porciento di e total di cifranan cu nos ta publica. Ta bon pa clarifica cu e informacion aki uzando data di CBS, e opcion uza ta ‘land van herkomst’ y no ‘land van Oorsprong’.

Na aña 2018 e total di importacion cu a bin Aruba for di henter mundo incluyendo China tabata alrededor di 2 miyon 185 mil florin. Di e suma total aki, casi 63 miyon florin tabata e suma total pa e dos categoria di productonan comestibel y no comestibel cu Aruba a importa directamente for di e pais China.

Durante e ultimo tres aña e importacion di Aruba for di China a mustra un aumento considerabel. Na 2017 – den e dos categoria cu nos a menciona ariba – Aruba a importa 48 miyon 650 mil florin. E cifra aki ta nifica casi un 2.5% di tur importacion cu a wordo haci e aña ey.

Na aña 2018 e cifra total di importacion di productonan Chines a aumenta na 62 miyon 770 mil florin. Kiermen el a aumenta cu 14 miyon florin compara cu e aña anterior. Y el a nifica mas cu 3% di e total di importacion registra e aña ey.

Na aña 2019 e data disponibel te luna di september ta mustra un total di 55 miyon florin. Es decir cu e cifra aki lo por aumenta un poco mas te hasta eventualmente surpasa esun di aña 2018.

Productonan mas importa.
A base di e data suministra pa CBS e segmento di productonan comestibel cu mas ta wordo importa for di China tin di haci cu pisca y otro sorto di productonan of bestia di lama generalmente seco, y otro bestianan sin wes’i lomba, ya sea prepara of conserva. Na aña 2017 a importa e tipo di productonan cu ta cay den e segmento aki pa balor di 110 mil florin. Pero na 2018, el a aumenta na 330 mil florin y na 2019 te luna di september e tabata 570 mil florin.

Pa loke ta productonan no comestibel cu mas ta wordo importa for di China, nan tin di haci entre otro cu: sigaria of tabaco, papel y carton, glas y cristal, articulonan di cuero y articulonan di biahe, mueble, matras, articulonan pa iluminacion y construccion prefabrica, cos di hunga y articulonan deportivo.

E segmento aki ta nifica e mayoria di productonan den costo di prijs di loke Aruba ta importa for di China. Na 2017 a wordo importa e sorto di productonan aki pa balor total di alrededor di 8 miyon florin. Un aña despues, e cifra aki a subi te cu 12 miyon florin. Na aña 2019 te cu luna di september pa e mesun concepto aki a wordo importa productonan pa un balor total di 14 miyon florin. E cifra aki ta esun mas halto di importacion pa e segmentonan di productonan importa for di China, durante e delaster tres aña.

Consecuencia.
E pregunta cu ta surgi ta: Con e restriccion di importacion di productonan Chines por afecta nos mercado local?

Ainda ta prematuro pa determina kico lo ta su impacto. Tur esaki ta depende di e desaroyo di e Coronavirus mes. Si e virus aki ta wordo debidamente controla, esaki lo permiti cu e actividad industrial y logistico lo wordo normalisa na China keto bay. Pero esey ainda lo tuma su tempo, pero no ta cla con largo e lo dura. Tur cos ta mustra cu e lo ta algo temporal. E hecho cu WHO ta purba pa evita panico mundial rond di e virus, y nan ta pronostica un posibilidad realista pa para e epidemia aki, ta trece hopi speransa.

Pero te aworaki no mester existi un panico local riba prijs di productonan Chines. Investigacion periodistico cu Bon Dia Aruba a haci ta indica cu actualmente nos mercado local ta bon surti cu productonan di China. Esaki debi cu tabatin demasiado saturacion di nan productonan den nos mercado local, considerando e cantidad di supermercadonan Chines cu ta opera rond di nos isla. Esaki ta trece cierto trankilidad temporal, ya cu e prijsnan ta mantene stabiel, pues no tin espacio pa abuso of speculacion riba e prijsnan di cierto productonan cu ta bin for di e pais Asiatico aki… Pero tur esaki ta depende con largo e situacion di importacion restringi di productonan for di China lo por dura.