Fundado di Amazon, Jeff Bezos a bisa ayera cu e tin plan pa gasta $10 biyon di su propio fortuna pa yuda combati cambio climatico.
Bezos, homber mas rico di mundo, a bisa den un post riba Instagram cu e lo cuminsa haci donacion na cientifico, activista y organisacionnan sin fin di lucro e berano aki pa protege Tera.
“Mi kier traha hunto cu otronan pa tanto amplifica maneranan conoci y explora formanan nobo di combati e impacto devastador di cambio climatico”, Bezos a bisa den e post.
Amazon, e compania cu Bezos ta maneha, tin un footprint di carbon enorme. Aña pasa, oficialnan di Amazon a bisa cu e compania lo traha pa haci 100% di energia cu ta usa bin di panel solar y otro energia renobabel pa aña 3020.
E tienda online ta depende riba combustibel fossiel pa avion, truck y van cu ta usa pa transporta biyonnan di producto rond mundo. Trahadonan na sede di Amazon na Seattle a expresa nan critica pa algun di e practicanan di e compania, pushando pa haci mas pa combati cambio climatico.
Bezos a bisa ayera cu e lo yama su iniciativa nobo e Bezos Earth Fund. Un vocero di Amazon a confirma cu Bezos lo ta usando su propio placa pa e fondo.
A pesar di ta entre e personanan mas rico di mundo, Bezos apenas recientemente a bira activo den donacion di placa na causanan manera otro biyonario, manera Bill Gates y Warren Buffett a haci. Na 2018 Bezos a cuminsa otro fondo, comprometiendo $2 biyon di su propio placa pa habri kleuterschool na barionan di menos recurso y duna placa na organisacionnan sin fin di lucro cu ta yuda famianan sin hogar.
Bezos, ken a funda Amazon 25 aña pasa, tin un stake den e compania cu tin balor di mas di $100 biyon.
