Prome Minister Evelyn Wever-Croes a informa cu hunto cu minister di Salubridad Publico, Dangui Oduber, su gobierno lo bay den e siguiente paso di purba di trece establecimento di clinicanan priva na Aruba.
Prome cu nan ta dal e stap aki, nan mester hinca bon den otro e legislacion pa garantisa calidad den e servicio aki. Ta conoci e retonan financiero cu gobierno di Aruba tin pa baha su gastonan ta grandi. Un gasto cu ta pesa hopi den presupuesto di pais Aruba y cu ta sigui crece keto bay ta esun di AZV. Seguramente e establecimento di clinica priva na Aruba lo alivia eventualmente un poco e gasto aki, y lo mehora e servicio pa nos comunidad.
Den pasado, gobierno di MEP tabatin un vision y maneho otro, restringiendo e tipo di apertura aki. Pero mirando e desafionan cu nos pais tin, nos por ripara un cambio di mentalidad politico di e partido aki cu ta forma gobierno hunto cu otro partidonan den coalicion (POR y RED).
E tema aki a resalta despues cu premier Wever-Croes a realisa un bishita cerca presidente Colombiano, Ivan Duque, unda nan a trata entro otro e topico di servicio di salud y cuido medico. Den e mesun tereno di salud, nos prome mandatario a papia cu e mandatario Colombiano riba nos hobennan yiu di tera cu ta studia medicina of ta haci un specialisacion den nos region y e retonan cu nos tin.
Segun premier Wever-Croes su colega di Salubridad Publico, Dangui Oduber ta hopi leu riba e tema di acreditacion di e profesionalnan aki,locual e ta considera ‘hopi bon.’
