Un corte na Moscu a duna multa na Twitter y Facebook di 4 miyon rubles (Afl. 112,654.01) cada un ayera, pa nenga di warda e datonan personal di ciudadanonan Ruso na su server na Rusia, e multanan mas grandi imponi riba companianan di tecnologia occidental bou leynan di uso di internet.
E multa di casi $63mil ta e prome multa di cinco cifra otorga na companianan tecnologico desde cu Rusia a adopta un legislacion cuminsando na 2012 diseña pa aumenta control di gobierno riba actividad online.
Un provision ta rekeri companianan tecnologico pa tene server na Rusia pa warda informacion personal cu nan ta colecta di ciudadanonan Ruso. Regulador di internet di Rusia, Roskomnadzor, a purba sin exito pa varios aña pa forsa companianan grandi manera Facebook, Twitter y Google pa move datonan di usuario Ruso na Rusia.
Comentando riba e veredicto di corte ayera, Roskomnadzor a bisa cu Twitter y Facebook lo ricibi un multa di 18 miyon rubles (Afl. 506,943.07) cada un si nan no cumpli e aña aki.
Aña pasa, Twitter y Facebook a ricibi un multa ekivalente na Aflt. 83.59 cada un pa viola e mesun regulacion di datonan personal. E castigo no tabatin efecto riba e dos compania, pues na december autoridadnan Ruso a aumenta e multa.
E ley ta permiti servicionan cu no ta cumpli cu e rekisito di warda data pa ser prohibi di opera na Rusia. Unicamente e red social LinkedIn a ser blokea te awo. Ta comprende ampliamente cu Facebook of Google lo genera demasiado disgusto publico pa autoridadnan tuma e stap aki.
