Pa florin cuminsa lora mas riba nos isla: Proceso burocratico, largo y costoso pa lanta negoshi mester cambia

Parlamentario Endy Croes a referi riba e tardansa cu ta wordo presenta ora cu bo ta pidi un permiso pa establece y legalisa un negoshi di cualkier tipo. Pero no solamente e tardansa, sino tambe con costoso e proceso aki ta resulta pa e inversionistanan.

Nan a yega di reuni cu e minister di e cartera aki, Xiomara Maduro, pa expone e problematica aki, y ya caba e mandatario a tuma accion pa atende cu e asunto, segun e parlamentario oficialista. Denter di algun luna e empresarionan lo conoce cambio riba esaki, ya cu nan lo bay digitalisa e proceso aki. E proyecto aki ta cay den cuadro di Aña di Innovacion cu gobierno a decreta pa 2020.

Costoso y largo.
Pero tambe el a vocifera su preocupacion, ora cu un ciudadano kier lanta su negoshi. E proceso cu bo tin cu cana awendia ta mucho burocratico y costoso. Inicialmente bo mester bay notario caminda bo mester paga entre 3 mil pa 3.400 florin pa bo lanta un NV of un VVA. Unabes cu bo ta pasa e proceso aki di yena tur bo documentonan, bo tin cu warda un promedio di 8 siman pa bo por bin haya bo documento di notario pa lanta bo compania.

Pero despues bo mester bay departamento Economico pa busca bo bevestigings verguning. E ta cualifica esaki como otro caminda di cruz. Eynan bo mester warda alrededor di 8 siman prome cu bo ta yega na remarca pa haya bo bevestigings verguning.

El a trece como ehempel Hulanda, unda bo ta paga 295 Euro na Notario, y apenas den 10 dia bo tin bo negoshi lanta y inscribi den Camara di Comercio. E kier trece esaki den claridad ya cu e punto aki tambe a haci parti di e plan of programa di gobernacion pa warda speransa den pueblo cu e proceso largo den tempo y costoso den placa, lo wordo cambia pa 2020.

E parlamentario a sugeri pa nos mandatario yama e cuater notario aden pa hunto nan por yega na un prijs mas accesibel. “Aworaki cu mas y nunca nos tin mester cu florin lora riba e luga aki,” el a declara.

El a trece dilanti cu den e programa di gobernacion ta para cu lo bay fomenta crecemento economico y gobierno lo aumenta efectividad y eficiencia den servicionan cu sector publico ta brinda na sector priva, elimina red tape y tardansa innecesario di otorgamento di diferente permiso.

Croes a trece esaki dilanti pa gobierno por pusha mas den e direccion aki. Pero tambe pa trece e trankilidad cerca e inversionistanan cu kier lanta negoshi, sinembargo nan ta keda tranca pa medio di e burocracia, tardansa y costoso di e proceso aki.

Den sintesis, Croes ta haya cu ta resulta un proceso largo, costoso y te hasta frustrante pa un empresario lanta un negoshi na Aruba. Un empresario cu kier lanta su negoshi for di acta di notario te ora cu e ta haya su bevestigings verguning, ta tarda por lo menos 4 luna prome cu por lanta un negoshi. “E ta inaceptabel den 2020,” el a bisa cardinalmente.