Un vuelo di charter di Home Office Britanico, cu ta responsabel pa inmigracion, siguridad y mantenimento di ley, a sali pa Jamaica a pesar di protesta y un caso den corte na ultimo ora.
Downing Street, residencia di prome ministro, a bisa cu a deporta 17 persona, pero otro 25 a keda atras pa motibo di orden di corte. E veredicto di e corte a bin dialuna anochi despues cu tabatin preocupacion cu cierto detenidonan lo no a haya acceso na conseho legal.
Tur esunnan cu a keda deporta ta ciudadano di Jamaica cu a keda condena pa crimen y cu a haya mas di 12 luna di castigo.
Den un declaracion vocero di prome ministro a bisa cu “nos ta lamenta severamente” e decision di corte cu a para salida di 25 persona, y cu lo apela e caso urgentemente.
“E delitonan cu e hendenan aki a comete ta inclui asesinato, violacion di ley di arma, diferente caso di violencia, di cual dos den e categoria di violacion o otro delito sexual, y 14 delito relaciona cu droga,” e vocero a bisa.
Dialuna pasa un corte di apelacion a dicta cu gobierno no por deporta detenido di prizon Colnbrooke y Harmondsworth, cerca di aeropuerto di Heathrow, despues cu abogadonan a argumenta cu problema cu señal di telefon mobil a haci cu cierto detenido no a haya conseho huridico.
A surgi protesta na e pais despues cu un informe a leak den cual ta conseha gobierno pa para deportacion di delincuentenan cu a biba na e pais desde nan infancia. E manifestantenan a argumenta cu mayoria di esnan deporta o ta pa deporta proximamente, ta hende cu a pasa mayor parti di nan bida na Gran Bretaña. Sin embargo, gobierno a laga sa di no lo pidi disculpa pa saca delincuente peligroso di e pais.
