Cuater Polis a ricibi certificado pa curso special

Rolf Dautzenberg, kende ta asisti Alto Comisario di Cuerpo Policial Aruba den tareanan di maneho, recientemente a organisa un curso di 3 dia cu ta cubri e diferente elementonan di liderazgo cu ta importante como base pa cualkier Polis cu ta desea di algun dia ocupa un posicion di liderazgo den e organisacion. E curso aki a wordo organisa pa miembronan di Cuerpo Policial cu actualmente ta riba e nivel di “middenkader”.

Ada Hasel, Lysander Besselink, Ashwin Zievinger y Jelitza Croes a completa e curso cu exito y recientemente a ricibi e certificado corespondiente. Despues di e lesnan di teoria y algun sesion di practica, nan mester a entrega un “werkstuk”, cual a wordo evalua pa Rolf Dautzenberg y Lito Laclé. Lysander Besselink, kende actualmente tin e funcion di “Brigadier eerste klasse” na Districto di Oranjestad a splica cu e cursonan aki ta esencial pa Polisnan haya oportunidad pa yega mas leu den nan trabao, esta pa ocupa un funcion di liderazgo.

E cuerpo ta hopi hoben y actualmente tin hopi miembro cu tin mas experiencia y mas añanan den diferente funcion di liderazgo cu ta preparando pa bay cu pensioen. Esaki ta haci necesario pa e hobennan ricibi e training necesario pa por ocupa nan funcionnan den futuro. Lysander Besselink a splica cu como miembro di Cuerpo Policial e ta aprecia e vision di Alto Comisario Adolfo “Dolfi” Richardson, kende ta kere firmemente den haci inversionnan den e personal pa nan por avansa den nan carera cu un bon base.

Cuerpo Policial Aruba ta existi desde aña 1986 y ta conta awendia cu mas o menos 600 Polis trahando incansablemente pa brinda siguridad na nos pueblo. Ta trata aki di 375 hende homber, 104 hende muhe y 120 empleado administrativo, trahando den 4 districto, cu Warda nan di Polis situa na Oranjestad, San Nicolas, Noord y Santa Cruz.

Orguyosamente Cuerpo Policial Aruba ta conta cu hopi respet internacional, specialmente pa su unidadnan manera “Motor Unit”, “K9 Unit”, “Arrestatie Team”, “Mobiele Eenheid” y “Duik Team”, sin lubida departamentonan conoci di patruya y recherche cu ta bon entrena y capaz pa investiga y soluciona casonan mas complica. Cuerpo Policial Aruba ta traha den cooperacion estrecho cu Cuerponan di Polis den Reino Hulandes manera Korps Politie Rotterdam Rijnmond, KLPD y RST, sin lubida otro partnernan internacional manera Interpol, DEA, FBI, RCMP, Force Protection Agency, ACCP y IACP.