Departamento di Asunto Economico (DEACI) den colaboracion cu “World Trade Organization Secretariat” (WTO) y “European Bank for Reconstruction and Development” (EBRD) a organisa e tayer nacional on the “Agreement on Government Procurement (GPA) and E-Procurement Tools for Aruba”.
Ayera mainta na Marina Surfside a tuma luga e tayer dirigi na diferente stakeholder y persona profesional di diferente ministerio y departamento di Gobierno cu mester cumpli cu “Government Procurement Agreement” (GPA). GPA ta un tratado internacional cu ta vigente pa Aruba tambe, y ta pa garantisa condicionnan di competencia habri, transparencia y no discriminacion riba tereno di contratacion publico. E tratado plurilateral a surgi na aña 1994, dentro di e structura di WTO, cu 48 nacion miembro participando.
Sharon Meijer, Policy Advisor Foreign Economic Relations di DEACI a splica cu den esaki e personanan cu ta asisti ta haya asistencia tecnico di World Trade Organization (WTO) y tambe di EBRD pa nan conoce e proceso ora gobierno ta haci oferta pa destaho publico, con por haci esaki di un manera mas nobo. Tambe nan a haya informacion riba diferente ley relevante y con usa di manera digital, pa aumenta transparencia y asina por stimula economia cu por yuda e negoshinan chikito y mediano cu tambe por participa den e oportunidadnan ey.
Tambe el a expresa cu e informacion aki tabata importante pa e personanan presente por siña con nan por aplica e reglanan di e tratado concerni, na momento cu nan organisacion kier cuminsa cu un proyecto of adkiri producto y servicionan, di mesun manera cambio innovativo ora cu tin cu cera contract publico cu lo trece cu nan mas transparencia pa comunidad empresarial y cu lo genera actividad economico y oportunidad comercial nobo.
Philippe Pelletier, legal officer di WTO, a splica cu esaki ta un acuerdo bilateral di cual Aruba ta forma parti, e proposito di esaki ta pa yuda paisnan incluyendo Aruba, pa realisa nan obligacion den cuadro di Agreement on Government Procurement, ademas di esey nan a tene discusionnan mas profundo di con E-Tools y E-Government Procurement Tools lo por yuda gobierno di Aruba pa logra e meta di GPA mas facil. Tambe Pellelier a comenta cu e tayer aki ta yuda pa gobierno por bira mas eficiente y transparente.
Minister di Finanzas, Asunto Economico y Cultura, Xiomara Ruiz-Maduro, cu asesoria di Prof. Steven Schooner di George Washington University Law School, a manifesta cu esaki ta pa esunnan cu ta maneha destaho publico.
E meta di e tayer ta pa familiarisa e participantenan cu e reglanan di destaho di e WTO Agreement on Government Procurement y hunto cu esaki e rekisitonan di suma y estadistica rekeri. Durante e tayer tambe a trata e reglanan ora ta haci destaho electronico. E ultimo aki ta importante ya cu recientemente Aruba a haci cambionan den e Ley di Destaho pa asina haci destaho publico via electronico posibel.
Minister Maduro a informa cu e cambionan cu a haci y e training necesario, Aruba lo por cumpli cu e reglanan internacional riba tereno di destaho publico, lo conoce un proceso di destaho mas transparente y mas eficiente por medio di destaho electronico cu lo yuda sirbi comunidad Arubiano na un miho forma.
