Diadomingo mainta, manera tradicion, Prome Minister di nos Pais a ricibi Prins y Pancho di Carnaval 66 na Bestuurskantoor na unda el a efectua e “Traspaso di Mando” simbolico na Prins cu Pancho pa e temporada di Carnaval 2020. Esaki a tuma luga den un ambiente hopi bunita na unda cu tur e monarcanan di Carnaval 66 a yega un pa un na Bestuurskantoor den autonan clasico y a wordo ricibi pa Prome Minister Evelyn Wever-Croes.
Dilanti di e mahestadnan di Carnaval 66 y nan mayornan presente, representantenan di SMAC, ganadonan di un of otro evento di Carnaval y e publico carnavalesco, e prome mandatario a duna un discurso dunando danki y felicita primeramente tur e monarcanan pa e bunita manera cu nan ta carga nos dushi Carnaval invertiendo tempo y fondo pa asina engrandece nos Carnaval. Tambe Wever-Croes a gradici famianan y tur esunnan cu di un forma of otro ta pone di nan banda pa asina haci nos fiesta cultural mas grandi mustrando mundo henter cu Aruba si sa con ta celebra Carnaval.
Prins y Pancho grandi di Carnaval 66 a lesa e decreto di e maneho cu nan lo desea di hiba y a haya ful atencion di nos Prome Minister kende a felicita nan y a desea nan exito den nan tarea pa guia paradanan di Carnaval 66.
Despues di e traspaso di mando y ‘yabinan’ a wordo entrega na e monarcanan, e monarcanan di Carnaval y representantenan di SMAC a wordo hiba pa e sala di Conseho di Minister na unda cu Wever-Croes a regala nos mahestadnan di Carnaval 66 un bunita pin pa asina nan tambe por keda cu un bunita recuerdo di nan bishita.
Wever-Croes ta desea Aruba henter un dushi temporada di Carnaval y a gradici tur esnan cu ta tuma nan tempo pa engrandece e fiesta cultural di mas grandi di nos pais. Wever-Croes ta enfatisa pa nos tur como un comunidad gosa carnaval grandemente y responsablemente. Cuida nos muchanan di solo y cuida nan oido y ban permiti nan gosa nan fiesta sanamente.
Aruba, Ban uni y demostra mundo cu nos si sa con pa celebra Carnaval.
