Ayera tardi a keda firma un contract colectivo (CAO) di cuater aña pa e trahadonan di e shete compania di construccion cu ta cay bou e paraplu di WAB, nan ta: Albo, Bohama, AWM, Croon Caribe, Thiel Corporation, Thiel Resources y Bobel Technical Services. E ta e fruto di un proceso di negociacion entre WAB y sindicato STA cu intermediacion di Mediador di Gobierno.

Den e acto di firmamento ambos partido a expresa e parti bon di e acuerdo colectivo aki, pero tambe riba e preocupacion y insiguridad cu ta existi den e sector di construccion.

WAB.
Tanto e vocero di WAB y representante di Croon Caribe, Wim Hoenink y presidente di STA, Diego de Cuba a expresa nan satisfaccion cu finalmente e proceso di negociacion a conoce un final, y cu awor e miembronan di STA y no miembronan tin un CAO cu ta conoce beneficionan primario riba aumento di salario y secundario tambe. Nan ta alrededor di 200 trahado afilia na e sindicato plus esunnan no afilia.

Nan a considera e CAO aki un modelo di CAO, caminda gobierno lo por evalua pa otro companianan den mundo di construccion por adopta y implementa esaki pa nan trahadonan.

Hoenink a gradici e comprension di tur hende durante e proceso di deliberacion aki, muy specialmente e trahadonan, ya cu nan a tarda hopi pa logra e CAO aki cu a demanda hopi pasenshi. Awendia e retonan ta grandi pa e companianan di construccion, debi cu ta existi un competencia no husto y esaki ta haci cu e companianan serio y responsabel tambe ta sufri.

Pero e ta contento cu ambos partido por a yega na e producto final di un CAO nobo pa e añanan venidero. Tambe un contract colectivo aki ta trece transparencia entre dunadonan di trabou y empleadonan, ya cu nan ta na haltura di kico lo tin pa futuro, y e ta gradici nan pa esaki.

STA.
Di parti di STA, e sindicalista De Cuba a duna danki na e delegadonan di WAB y tambe na nan delegadonan sindical, y seguramente na Mediador di Gobierno, Anselmo Pontilius cu a intermedia den e trayecto aki. “E no tabata un caminda facil,” el a bisa.

De Cuba a bisa cu mester compronde cu nan tabata negoshando practicamente un contract colectivo pa shete compania pareu. E ta reconoce cu den un proceso asina, pa bo por complace tur hende, e ta hopi dificil.

E sindicato ta contento cu na final e trahadonan a conoce nan aumentonan y beneficio secundario bon hinca den e CAO aki. El a haci un calculacion bruto na placa, caminda e trahadonan ta bay conoce entre nan salarionan y beneficionan, un adelanto entre 8 mil pa 9 mil florin den cuater aña. Sin conta otro sorto di beneficionan chikito aden. E ta bisa cu mirando e tempo dificil cu e pais Aruba ta pasando aden, STA ta considera esaki como un bon CAO. “Pasobra tin hopi compania na Aruba cu no sa kico ta aumento,” el a laga sa.

Competencia no husto.
De Cuba a bisa cu e mundo di construccion no ta facil mas awendia. Un problema cu ya caba a wordo canalisa debidamente na gobierno tin di haci cu cheap labor. E situacion aki ta afectando cardinalmente e companianan di construccion aki, cu ta companianan serio y cu ta cumpli debidamente cu belasting.

El a referi cu e dirigentenan di WAB a yega di traha varios rapport cu a wordo entrega na gobierno, unda nan ta ilustra den forma bon detaya, e situacion cu sector di construccion ta pasando aden.

“Si nan ta hinca nan nanishi den e documento ey, y bay studi’e debidamente, e gobierno di Aruba lo sali gana,” segun presidente di STA. E ta calcula cu gobierno di Aruba ta perde di haya den caha mas cu 70 miyon florin pa aña for di impuesto di companianan di construccion cu ta baha bay sin cumpli cu nan compromiso fiscal.

E ta kere cu gobierno di Aruba mester hiba un control mas estricto pa locual ta e otro companianan cu no ta cumpliendo debidamente cu nan compromiso cu pais Aruba. Nan ta companianan cu no tin un CAO pa nan trahadonan. P’esey e ta spera, y como sindicato nan ta anhela cu nan por bini cu un minimo di beneficionan laboral, tanto salario como beneficionan secundario, pa e trahadonan den mundo di construccion. E ta spera cu gobierno por bay di acuerdo cune pa tur compania di construccion na Aruba por cumpli cu e exigencianan aki pa nan trahadonan. E ta haya cu e CAO aki por bira un documento importante pa pais Aruba.

Ademas e sindicalista ta comparti e preocupacion cu e companianan di construccion afilia na WAB ta pasando aden debi na competencia no husto. Tin compania cu ta ofrece un bidding hopi mas abou y na final nan no ta cumpli cu e trabou debidamente. Despues e companianan cu ta resorta bou WAB mester wordo hinca aden pa bin caba cu e proyecto. De Cuba a trece dilanti algun ehempel di esaki como e prome fase di linear park y tambe durante renobacion di caya grandi.