Sinagoga Beth Israel a recorda cu 75 aña pasa e campamento di concentracion y genocidio Nazi na Auschwitz a wordo libera. Na e ocasion aki, Sinagoga Beth Israel y comunidad Hudiu na Aruba hunto cu un grupo di invitado a participa di e ‘Kabbalat Shabbat’, pa conmemora e liberacion di e campamento di genocidio Nazi.

E rabbi Daniel Kripper di Sinagoga Beth Israel a declara na Bon Dia Aruba cu e ceremonia tabata pa recorda e acontecimento historico aki, pero principalmente e consecuencianan di dje, pa evita cu un crimen asina contra humanidad lo por sucede un biaha mas.

 

Durante e ceremonia aki tabata presente nos minister di Finanzas, Economia y Cultura, Xiomara Maduro y pastoor di Jairo Maduro. Durante e servicio di ‘Kabbalat Shabbat,’ e mandatario Maduro hunto cu e rabbi Kripper a haci un oracion pa nos pais Aruba. Igualmente nan a participa na e ceremonia di santificacion di biña y kibramento di pan como parti di e custumber, despues di e Shabbat.

E rabbi Kripper a declara na e matutino aki cu no ta e prome biaha cu e mandatario en cuestion ta asisti na nan eventonan, y nan ta aprecia y balora di por a conta cu su presencia. “Pa nos e presencia di gobierno den nos acto ta un apoyo tambe”, el a bisa.

E rabbi di Sinagoga Beth Israel ta haya cu e ta un hecho cu ta contribui na actividad comunitario, y tambe un reconocimento pa loke e comunidad Hudiu ta aporta na e crecemento, bienestar y prosperidad di e pais. “Nos ta aprecia Aruba pa su bondad, tolerancia y apertura,” el a bisa.

E ta considera Aruba como un ‘isla modelo’. Ora e ta haya bishita di afo regularmente e ta wordo confronta cu e pregunta: ‘Con e convivencia entre rasa y religion ta na Aruba?’ E rabbi Kripper su contesta ta: “Mi no ta ripara esey! Nos ta convivi naturalmente. Na Aruba no tin problema di e tipo ey!”

E hecho cu tin hendenan marginal ta algo cu ta existi den tur sociedad, ya cu no ta existi sociedad perfecto. Pero pa loke tin di haci cu harmonia y convivencia, e ta haya cu Aruba berdaderamente ta un paraiso. E ta kere cu nos tur mester percura pa ‘cuida e hardin aki.’ Pa evita cu lo por bin biento di afo cu ta afecta nos.

Ideologia extremista.
E ta haya lamentabel cu awendia ainda ta existi señal alarmante den henter mundo di un especie di nacemento bek di ideologia extremista. “Ideologia extremista cu ta discrimina otro hende y ta carga di odio y resentimento,” el a bisa. E ta wordo refleha den discriminacion racial y tambe discriminacion contra grupo minoritario.

Pero tambe –segun rabbi Kripper– e acto di odio contra e Hudiunan ta continua. Sinembargo e ta haya cu e Hudiunan ta custumbra caba di sufri e tipo di fenomeno aki, ya cu nan ta wordo discrimina for di miles di aña atras.

E ta haya cu awendia e antisemitismo ta wordo mescla cu e anti-sionismo. El a splica cu hopi hende no ta ataca e Hudiunan pasobra e ta un politica incorecto. Pero si nan ta ataca e estado di Israel. E rabbi Kripper ta aclaria cu e no kiermen cu e estado di Israel ta absolutamente perfecto, pasobra como cualkier estado, nan tin cosnan bon y cosnan negativo.

Sinembargo e ta haya cu e estado di Israel ta wordo considera un modelo di democracia den e region di Medio Oriente. Tambe como un estado cu ta respeta derechonan humano. Un estado cu ta apoya y brinda su solidaridad na otro nacionnan cu ta pidi su ayudo.

E tipo di anti-Israelismo aki, specialmente for di ideologia iskierdista di Europa, pero tambe di movemento di derecha, caminda ambos ideologia ta haci un tipo di causa comun cu ta un preocupacion latente di e comunidad Hudiu.

“Pero mi ta haya cu en bes di preocupa nos, mas bien e situacion aki mester ocupa nos,” el a bisa. Kiermen nan mester ta mas uni cu e hendenan di bon boluntad y fortalece e cadena di cooperacion entre Hudiu, Cristian, Musulman. E ta haya cu nan no mester crea odio contra otro, sino cu nan mester stima otro, ya cu esaki ta e mandato di e tres religion monoteista.