Estadonan Uni a menasa cu sancion ayera e empresa petrolero Spaño Repsol, Chevron di Merca mes y e empresa di India Reliance pa nan actividadnan relaciona cu Venezuela, aunke a reserva e critica mas duro pa e consorcio estatal Ruso Rosneft.
“Ya sea Rosneft, Reliance, Repsol o Chevron aki na Merca, nan mester tin cuidao pa loke ta nan actividadnan na Venezuela, cu ta apoya directa o indirectamente dictadura di Nicolas Maduro,” un funcionario halto Mericano a bisa, den comunicacion cu prensa via telefon, pidiendo anonimato.
“Nos ta solamente na mita (di e campaña Mericano di presion y sancion contra Maduro) y nos lo move solamente den un direccion, cu ta padilanti. Y nan actividadnan (di e empresanan) ta claramente preocupante,” segun e fuente.
Encuanto e posible sancionnan contra Rosneft, algo cu ta circula como rumor na Washington desde varios siman caba, e funcionario a responde cu e opcion ey ta “absolutamente riba mesa.”
Rosneft ta un di e corporacionnan Ruso mas activo na Venezuela, unda nan a aumenta actividad petrolero y a converti den e gran intermediario di crudo Venezolano despues di e sancionnan imponi pa Merca riba e empresa petrolero estatal Venezolano Pdvsa.
Pa loke ta Repsol, e compania Spaño a gradualmente reduci su interesnan patrimonial na Venezuela, cu na ciere di tercer trimester di 2019 tabata yega na 351 miyon euro, 23 % menos cu na fin di 2018. Repsol ainda ta ricibi crudo Venezolano como pago di debe di Pdvsa.
Chevron ta e unico compania di petroleo Mericano grandi cu ta na Venezuela ainda, unda nan ta conta cu 8.000 empleado, y cu a haya permiso special pa keda opera a pesar di e sancionnan.
