Partido MEP: ‘Mike De Meza preocupa cu Minister Bikker ta bay investiga “Fake News”?’

E locura cu candidatonan/Parlamentarionan riba e lista berde tin biaha ta pone hende pensa ta con preocupa nan lo ta drumi anochi pa e siguiente dia skirbi tanto barbaridad y riba dje kere cu ainda pueblo ta kere den nan ‘Fake’ palabranan y promesanan.

Awo, e politico di mas ‘Fake’ cu Aruba a conoce den su historia, despues di su lider Mike Eman, Parlamentario Mike de Meza, ta preocupa cu Minister di Husticia Andin Bikker ta bay investiga ‘Fake News’ y bin cu leynan pa atende cu esaki. Mientras cu cualkier pais drechi cu ta respeta su mes, cualkier gobierno di mundo cu ta respeta su ciudadanonan, kier combati ‘Fake News’ pa asina e pais progresa. Pero pa sr. de Meza, esaki ta bay directamente contra su principionan corupto y Fake.

Kico ta Mike de Meza su preocupacion? Di kico Mike de Meza tin asina tanto miedo? Dicon Mike de Meza no kier pa investiga ‘Fake News’? A caso, ta Mike de Meza mes ta tras di tur e ‘Fake News’ pa bruha tera?

Nos ta corda, cu Mike de Meza, ‘the Fake man himself’, e campion den ‘Fake News’, a ‘Fake’ reapertura di nos refineria no un biaha, no dos biaha, sino tres biaha. Anto na grandi. Pero, si tawata tin ley vigente pa atende cu esnan cu ta plama ‘Fake News’ rond, e pueblo aki lo no a celebra 3 biaha e ‘Re-Apertura Fake’ di nos refineria, gastando miyones di florin na e celebracionnan aki. Si su Gobierno a keda na mando, awe ta cuanto biaha nos lo a celebra re-re-re-re-apertura di e refineria?

Y pueblo por corda e holo di gas cu Mike de Meza a haya? Un holo stinki cu a compañe na unda cu el a bay pa dianan largo. Un holo cu a pone organisa full un evento dilanti di nos refineria bisando cu awo si e refineria ta bay habri. Luga atrobe tawata ‘Fake News’, un holo di gas ‘Fake’. Si su Gobierno a investiga ta di unda e holo ey tawata bin, Mike de Meza lo no a ‘Fake’ reapertura di e refineria un biaha mas na grandi.

Si su propio Gobierno e tempo ey, a laga investiga su prome ‘Fake News’ tocante reapertura di e refineria, awe e lo no tin e preocupacion cu ta biba den dje di wordo investiga. Awe e lo no ta bibando cu e miedo di wordo investiga.

Un cos si ta sigur, y sigur no ‘Fake’, cada dia cu pasa oposicion di AVP ta sorprende nos mas. Un oposicion zwak, sin liderazgo, sin fatsoen y sin moral. Tur ta dal den otro manera galiña kloks ta treciendo tur dia ‘Fake News’ pa purba bruha e pueblo aki cu ya no ta kere mas den nan.