Dialuna mainta a topa cu diferente desafio ora cu parlamento mester a cuminsa cu e reunion publico riba otorgacion di tereno cu Minister Benny Sevinger. Finalmente a sigui y lo continua diabierna. MEP entre otro a pidi den un mocion pa un investigacion haci pa Algemene Rekenkamer.
Esaki tabata e prome ronda di un reunion cu a wordo yama pa fraccion MEP na januari y awor e segundo ronda lo continua diabierna merdia 9 di september caminda ta turno pa Minister bin contesta.
Ora cu e reunion a inicia parti mainta, tabata tin un tiki tardansa pa motibo cu algun persona desconoci a kibra e tuberia di e airco na Parlamento unda a keda sin ventilacion pa e resto di e dia. Esaki segun Presidente di Parlamento Sra. Marisol Lopez Tromp ta mustra di a wordo kibra intencionalmente pa e airco no traha. Na prome instante no tabata tin quorum tampoco cu solamente seis parlamentario di fraccion MEP presente, Partido PDR tabata presente y dos miembro di fraccion AVP cu tambe Minister Benny Sevinger y Prome Minister Mike Eman.
”Nos no tabata tin suficiente hende pa inicia e reunion publico, pues e ora ey locual mi a haci ta move a reunion pa un ora mas laat anto e ora ey si tabata tin e quorum. Mi ta kere nan a dicidi tog di bini pa asina forma un mayoria di miembro di Staten pa por tene un reunion”, Presidente di Parlamento Sra. Marisol Tromp ta bisa Bon Dia.
Ta acusa otro y desvia
Un rato e reunion a bira cayente no solamente pasobra e airco no tabata trahando, sino tambe pasobra tur dos fraccion a cuminsa tira palabra pa otro te cu hasta desvia di e tema cu tabata tratando. ”Tin dos cos cu ta toca e ordo den Parlamento; Uno ta e parti emocional ora cu hende cuminsa grita of acusa otro di cos siendo cu nan no ta na palabra. Tambe tin otro parti di ordo caminda ta toca e tema di e reunion cu hopi di e parlamentarionan tin bes ta desvia. E ordo di e reunion por ehempel ta, nos ta papia awe tocante otorgamento di tereno anto ta cuminsa papia riba otro topiconan cu no ta riba agenda.”
“E prome parti a bay mas riba e topico pero mas e dia ta avansa, bo tabata ripara cu tin Parlamentarionan ta bay den cosnan di pasado of topiconan pa cuestiona presencia di tal fraccion den e reunion locual no ta e puntonan di e agenda”, Sra. Tromp ta bisa. Diferente temanan di pasado a bini pa dilanti entre otro caminda fraccion di AVP a menciona con tempo cu MEP tabata den gobernacion con tabata haci fabornan politico pa famia y amigonan na unda hasta a bin cu documentonan pa por prueba esaki.
‘Minister tin cu duna un splicacion’
Parlamentario Sr. Melvin Tromp ta bisa cu oposicion no mester papia un cos sin lubida kico a wordo haci caba y mirando con e reunion a bay por ripara oposicion ta mal bruha den nan argumento. ”Hopi cos a wordo specula y papia, si bo scucha e argumento bo por deduci mesora cu nan ta totalmente bruha. Nos a tende hopi cos pero te ainda mi no a mira e curashi pa bay Ministerio Publico si bo ta kere cu tin un caso cu ta indica cu tin hende cu ta desvia di locual nos leynan ta rekeri”, Sr. Tromp ta bisa. Sr. Tromp ta agrega cu e no ta un sorpresa pasobra na varios ocasion por a mira e tipo di argumentonan ”fofo” di oposicion aki bini dilanti. Parlamentario y lider di fraccion MEP, Sra. Evelyn Wever Croes ta bisa Bon Dia cu Parlamento tin un responsabilidad riba su mes pa denuncia, cuestiona y haci propio investigacion prome cu bay Ministerio Publico. ‘”Nos a bay varios biaha Ministerio Publico y nan a manda nos bek pa haci nos trabao den Parlamento. Esaki nos ta haciendo aworaki, treciendo pruebanan dilanti pa e Minister duna cuenta. Si Minister duna un bon splicacion riba tur e cosnan straño cu nos a trece pa dilanti anto convence nos e ora ey nos por ta sigur cu no tin ningun fraude of corupcion”, sra. Croes ta bisa Bon Dia.
E chens no ta grandi cu Minister ta bay logra convence nan di esey pasobra segun Sra. Croes,oposicion a mira cosnan hopi straño tuma luga anto Parlamento ta haciendo su trabao pa trata cu nan debidamente. Parlamentario Sr. Glenbert Croes por ehempel a entrega un mocion caba cu ta pidi pa Parlamento bay di acuerdo pa Algemene Rekenkamer haci un investigacion anto si sali e echonan castigabel, e ora ey por bay Ministerio Publico. ”No por bay Ministerio Publico sin cu tin algo concreto den bo man y nos ta canando e caminda cu Ministerio Publico a bisa nos pa cana.”
Casi 4500 firma caba contra destruccion
Un di e casonan mas conoci cu a wordo lanta contra Land Aruba relaciona cu otorgacion di tereno ta esun di fundacion Aruba Birdlife Conservation unda ta bringando pa un tereno cu ta para berde den e ROP (Ruimtelijke Ontwikkelings Plan) pero cu tog a wordo otorga pa construccion di un proyecto di condominio. Presidente di Aruba Birdlife Conservation, Sr. Greg Peterson ta conta Bon Dia cu nan a haya mas cu 3,500 firma den un dia pa un peticion cu nan ta haciendo online pa stop destruccion di areanan di naturalesa. ”Nos kier yega 5,000 firma anto e ta algo planea pa nos haci dos luna largo. Un di e puntonan di e peticion aki ta pa no cambia nada den e ROP cu ta marca berde”, Sr. Peterson ta bisa. Actualmente nan a ricibi casi 4.500 firma caba.
Bon Dia no a logra haya un reaccion for di Minister riba e asunto aki riba cual tambe el a wordo cuestiona den Parlamento pa duna cuenta di dje y lo mester contesta den e siguiente ronda di e reunion publico.
