Diahuebs Minister Armando Lampe a haya e grato noticia cu un compania di transport ta willing pa coopera cu e transporte di e diferente digi-boardsnan cu lo mester wordo instala na diferente scolnan na Aruba. Enseñansa a bolbe haya apoyo di sector priva.
Ta asina cu despues cu Italo Arubano a saca un man, enseñansa ta bolbe haya e apoyo di e compania Rush Transport. Sr Alberto Arrindell propetario di Rush Transport conhuntamente cu su collega sr. Francis Semerel a duna un man, pa diferente digi boards wordo entrega na diferente scol na Aruba. Un biaha mas por a ripara e caranan di felicidad y positivismo pa cu e proyecto aki, ora di entrega e materialnan aki.
Minister Lampe ta keda subraya cu cada un di nos, tin cu yuda aporta na enseñansa di nos pais y cu sigur e apoyo di sector priva, ta algo di aprecia y Minister Lampe ta sumamente contento cu un compania a sa si extende un man atrobe y ta spera cu asina lo tin mas cu tambe lo sigui apoya nos enseñansa. Digitalisacion ta algo cu nos tur tin cu acepta y enseñansa no por keda atras. Ya por a nota varios cambio y conhuntamente nos lo sigui prepara nos muchanan pa cu e era nobo di digitalisacion na unda cu Plan Enseñansa Nacional ta e guia pa nos logra esey.
Na final di dia, despues di haci entrega na 10 diferente instituto di enseñansa, por a nota un cara di satisfaccion di esunnan cu a haci e entrega tambe. Danki na un y tur cu a coopera y spera cu enseñansa sigui haya e apoya cu e mester di dje.
