Departamento di Salubridad di Aruba (DVG) a informa cu aunke te ainda niun caso di Novel Coronavirus a wordo registra na Latino America y den region Caribe, y logicamente Aruba, toch nos no por descarta e introduccion di e virus aki den nos isla.

Eugene Maduro di e departamento di Epidemiologia di DVG, a declara durante un conferencia extraordinario di Bureau Rampenbestrijding Aruba (BRA), cu un articulo a mustra e riesgo con e Coronavirus ta propaganda su mes rond mundo. Esaki door di e cantidad di biaheronan cu ta sali for di China pa e resto di mundo.

Den e lista di e 30 paisnan cu tin e riesgo mas halto di haya e virus, ta aparece Hulanda. E partner importante den Reino Hulandes tin vuelo directo pa China y otro pais di continente Asiatico cu tin caso confirma caba. Pues Hulanda ta core e riesgo cu caso di Coronavirus ta wordo importa den su teritorio. Esaki ta haci cu na Aruba nos mester ta cauteloso.

El a bisa cu door di e relacion Hulanda-Aruba, e riesgo t’ey cu un caso di Coronavirus lo por bati porta di nos frontera y yega nos isla. E unico cos cu nos por haci ta sigui e medidanan di prevencion, si un caso sospechoso ta presenta na Aruba.

Sintoma y casonan.
P’esey ta importante pa tin un plan pa implementa, ya cu semper mester descubri na tempo un caso sospechoso, pa asina por isola e persona y evita cu e virus lo por plama.

Un persona ta sospechoso pa e Novel Coronavirus, ora e persona ta desaroya sintomanan di problema respiratorio entre nan tosamento y dificultad pa hala rosea. Tambe e persona mester tin un link cu un biahe pa China. Principalmente pa e provincia di Wuhan, unda cantidad di caso a keda descubri. Otro criterio ta cu e persona tabatin contacto hopi estrecho cu un persona malo caba diagnostica cu e Coronavirus. Tambe e persona cu ta duna cuido na e hendenan cu ta malo cu e Coronavirus ta core e riesgo di contagia.

E mayoria di caso a wordo conforma na China. Pero pafo di e pais Asiatico aki tin 82 caso confirma den 18 pais cu a wordo afecta cu e Novel Coronavirus. Sinembargo considerando cu e ta un virus nobo hopi cos ainda ta insigur rond di dje. Entre otro con contagioso e por ta, periodo di incubacion prome cu bo ta presenta e sintomanan. Pero si nan ta compar’e cu e virus di SARS cu a afecta mundo na aña 2003, ya cu su sintomanan ta parecido: tosamento, keintura y problema cu garganta. Loke ta caracterisa e virus aki ta cu bo ta haya neumonia severo. Pa e victima ta bira dificil pa hala rosea, locual ta rekeri cu e mester wordo interna den hospital.

Sinembargo cada biaha e test pa detecta e presencia di e virus ta wordo perfecciona mas. Door di tecnica avansa e test ta birando mas specifico pa detecta e casonan sospechoso di Coronavirus. P’esey tur dia e cifra di casonan detecta y confirma ta sigui aumenta.

Loke si ta un echo ta cu tin transmision di hende pa hende andando. Pero loke no a wordo descubri ainda con e ta wordo transmiti. Pero considerando cu e ta causa problema respiratorio no ta wordo descarta un transmision di e virus via dropper. Pero tambe via likido di curpa, ya sea wowonan cu ta humedo, nanishi y boca cu aparentemente nan ta e ruta di infeccion di e virus aki.

Cifranan.
Diahuebs pa 3:30 atardi, Maduro a duna un up date di e situacion di e Novel Coronavirus cu ta afectando mundo henter actualmente. Aunke sigur e cifranan awe por ta otro, na e momento ey Organisacion Mundial di Salud (WHO) a indica cu tabatin 7.818 caso confirma di e Novel Coronavirus di cual casi 99% ta casonan registra na China, unda e virus a wordo descubri originalmente.

Aunke oficialmente tin alrededor di 12 mil caso sospechoso di cual 1.370 caso ta hendenan cu ta basta malo y 170 morto a keda confirma victima di e virus aki na China. E hendenan mas vulnerabel ta esun cu ta padece un malesa cronico, manera diabetes, problema cardio-vascular y presion halto.

E prevencion pa evita e contagio di e virus aki ta un bon higiena of labamento di man. Ora di tosa of nister haci esaki den elleboog y evita pa bo tin contacto cu hende malo confirma cu e Coronavirus. Si den caso bo ta presenta algun di e sintomanan, ta importante pa bo tuma contacto cu bo dokter di cas.