Durante ultimo paradanan di carnaval, a bin varios comentario riba rednan social den cual persona a nota cu tabatin mayornan of persona cu muchanan di edad 0-5 aña, cu ta demasiado chikito pa ta den un evento asina.

Twyma van der Biezen, kende ta public relations officer di Social Crisis Plan, a bisa cu pa temporada di carnaval nan tin campaña di conscientisacion pa comunidad di Aruba, caminda nan ta haci esaki conhuntamente cu 34 partner tur cargando e mensahe di ‘ban cuida nos muchanan den tempo di carnaval’.

Segun Van der Biezen, e campaña ta sostene e mensahe y tambe pensamento cu mayornan of cuidado di e mucha ta carga e responsabilidad, pa asina tur mucha por ta sigur y protegi specialmente den temporada di carnaval.

Un temporada cu ta hopi fiesta, hopi uzo di alcohol y oranan largo di evento. “Locual nos tin den nos campaña ta den dos parti, di conscientisacion pa cu muchanan di 5 aña of menos, caminda nos ta conseha mayornan pa evita bay cu mucha den parada di carnaval, pa motibo cu esaki no tin efecto positivo riba e mucha.”

E efecto di zonido y multitud di hende cu ta haci uzo di alcohol, unda cu mucha ta para pa oranan largo, ta efecto negativo pa mucha bou 5 aña. Pa e motibo aki, nan tin e mensahe di ‘considera mi, carnaval no ta pa mi’.

Nan tin diferente material cu lo bay entrega entrante e siman aki. Pa sigui duna e mensahe na comunidad y cu tur nan partner ta bay carga e mesun mensahe y lo tin diferente material cu ta bay saca den medionan di comunicacion.

E otro mensahe cu tin ta pa esunnan mas grandi di 5 aña di edad, ‘pone mi siguridad na prome luga’. Cu esey nan ta referi na tur tip cu nan tin conhuntamente cu tur otro instancia, manera Fundacion Pa Nos Muchanan, Fundacion Respetami, Tienda di Educacion y otro instancia cu a pone input y partner cu a duna tip pa mayornan tambe por sa of haya e guia pa proteccion di nan yiu.

Sea pa cuido di horea, nan tin Quota Internacional Club di Aruba cu tin nan earplugs special pa mucha. Pa e parti di solo, nan ta considera pa haci uzo di sunblock. Tambe alimentacion pa come saludabel, bebe hopi awa, y pa nan sa kico pa haci pa nan yiu por sinti sigur durante carnaval.

Van der Biezen ta remarca cu tur esey ta tipnan cu ta sacando afo den comunidad, pa asina ta consciente di nan comportacion y kico pa haci pa pone nan yiu na prome luga y despues interes personal como mayor. Pa asina por tin un carnaval mas sano y responsabel ‘teniendo na cuenta nos muchanan’.

Nan a tuma iniciativa aki pasobra cu Social Crisis Plan ta traha pa boga pa bienestar y proteccion di tur mucha, basa riba derecho internacional di mucha. Esey ta conta den tur caso, en special den carnaval.

“Locual nos a ripara den ultimo aña y aña aki tabata un discusion fuerte, caminda cu e participacion di muchanan y presencia di baby durante carnaval te laat anochi ta visibel y ta birando tolerabel. Esaki ta locual nos no kier y nos mester ta mas consciente como mayor y comunidad, cu tin cierto barera sinta pa proteccion di muchanan”, el a expresa.

El a bisa cu mucha no mester lanta cu un trauma of un efecto cu por ta dañino na nan curpa, pa ta exponi na factornan cu ta hunga rol den carnaval. Por ehempel, e parti di oido cu por tin efecto despues di tempo. Of kemadura di solo cu por ocasiona na adulto cancer di cuero. E ta bisa cu factor ta cosnan cu no ta nobo, pero ‘a yega tempo pa para keto na dje y considera severamente e celebracion di carnaval’.