Minister di Enseñansa, Armando ‘Rudy’ Lampe: ‘Modelo di centro di cuido educativo lo beneficia calidad di educacion’

Ayera mainta, minister di Enseñansa, Ciencia y Desaroyo Sostenibel, Armando ‘Rudy’ Lampe a ofrece un conferencia di prensa tocante e programa special educativo ‘My Kinderhouse’, dirigi pa muchanan di 0 pa 3 aña, crea pa Drs Amoriza Gunnink.

El a menciona cu a firma un MoU cu un di e scolnan di mas grandi di Merca ‘K-12’, pa asina ofrece un virtual Schooling. Tambe el a anuncia e maneho nobo pa loke ta educacion na otro localidad.

Di mesun manera, el a splica cu mirando e desaroyo cu tin aworaki, ta enfatisa mas loke ta yama ‘early childhood’ – edad di 0 pa 8 aña – ta fundamental den desaroyo di un mucha, asina como a sigura cu e prome tres aña ta esunnan di mas importante den bida di un ser humano.

Pa motibo aki, Lampe hunto cu minister di Asuntonan Social, Glenbert Croes y Drs Amoriza Gunnink, specialista den diseño di curiculo y pedagogia escolar, a anuncia un modelo di centro di cuido educativo innovador y cu lo bira un ‘best practices’ y lo beneficia e calidad di educacion dirigi pa muchanan entre 0 pa 3 aña, cu ta na voorschoolse opvang.

Gunnink, fundado di e programa escolar ‘My Kinderhouse’ di Canada, a bisa cu ta hopi importante pa reconoce den pais Aruba e parti esencial pa crea un infrastructura social y educacional cu ta inclui educacion preescolar di calidad, pa por yuda establece un bon fundeshi educacional y apoya e desaroyo holistico di e muchanan.

Actualmente, el a afirma cu ‘hopi mucha no ta actualisa nan desaroyo na nivel cu nan mester tin pa drenta kleuterschool’ y esaki ta causa un impacto grandi ariba nan capacidad pa avansa den nan estudio.

Na comienso di scol basico e muchanan ta atras, e desaroyo ta bira mas grandi si no tin intervencion pa e muchanan. Den un estudio internacional pa cual Gunnink ta analitico y cu ta yama ‘E poder y promesa di educacion trempan’ di e autornan Elizabeth A. Shuey y Milos Kankaras, nan a delinea y demostra diferente set di habilidad, capacidad y actitud den e prome añanan di bida di un mucha, manera lenguahe, matematica, habilidad visual y motorico, desaroyo social y emocional, creatividad, entre otro, cu ta esencial pa promove y premira un bida exitoso y resultadonan positivo ora nan ta adulto.

Gunning a specifica cu e plan y metanan cu ta trahando ta pa trece innovacion den pedagogia, diseño di educacion preescolar y asina trece un modelo cu ta integra diferente filosofia di educacion preescolar rond di mundo.

E programa aki lo funciona como un scol preescolar y lo ofrece diferente pedagogia di miho practica educacional pa e isla, cu no lo wordo sostene pa Gobierno, sino cu e ta bay ta priva y lo cuminsa cu aña escolar nobo na augustus.