Parlamentario Dellanire Maduro (POR): ‘Aworaki mi lo demostra unda e hobennan ta hunga un rol den futuro’

Dellanire Maduro, parlamentario nobo di fraccion di partido POR y presidente di comision di Salud den Parlamento, a ofrece su prome declaracionnan hunto cu tur e miembronan di Partido.

Durante un conferencia di prensa di ayera mainta, el a ofrece algun palabra pa e medionan di comunicacion social presente, durante cual el a bisa cu como hoben profesional, esaki ta un posicion hopi importante pa e futuro di e pais. Tambe el a sigura cu ta contento di forma parti di partido POR, unda aworaki e lo demostra unda e hobennan ta hunga un rol pa e futuro.

Asina mes, Maduro a afirma cu den momento caba cu nan a traha e programa di partido POR, tin diferente punto cu nan a haci enfasis riba dje, a sinta cu diferente instancia y a reuni cu diferente hende den comunidad, cu a trece preocupacion y ideanan cu por traha riba nan.

El a splica cu un di nan ta salud. Aki nan a pone e parti di AruBig, cu ta e manera con Aruba mes ta determina e forma con ta reconoce e dunado di cuido. No solamente cu dokter, sino tambe cu dentista y apotheek, cu ta hunga un rol importante den cuido, unda nan tin cu structura esey y yena e espacio necesario pa por tin un control adecua.

Ademas, el a comenta cu no solamente ta e parti di dunado di cuido por haya beneficio y asina nan por cumpli cu e calidad di rekisito cu e pais ta pone, sino cu tambe beneficionan pa e pashent, pa nan por tin e trankilidad cu nan sa cu e persona cu ta dunando cuido ta capacita pa haci esey.

Otro di e punto cu Maduro a trece dilanti, ta e parti di pensionadonan. El a bisa cu e tabatin varios combersacion cu hendenan cu a drenta den periodo di pension y cu algun di nan a expresa cu nan kier bay mas laat cu pension, of algun di nan a desea di bay mas prome.

“Mi ta kere cu nos por ofrece e flexibilidad cu si e persona di mas di 60 aña ta desea di bay cu pension, cu e tin e posibilidad aki”, Maduro a sigura.

Pa finalisa, e ley laboral tambe a bin dilanti, na unda el a señala cu e dunado di trabou por tin mas eficacia den su produccion di cualkier area cu e ta traha y tambe pa e trahado por ta mas eficiente den e momento cu e ta traha.