Hackernan sofistica a infiltra oficina di Nacionnan Uni na Geneva y Vienna aña pasa den un aparente operacion di spionahe, y nan identidad y e magnitud di e data cu nan a horta ainda ta desconoci.
Un documento confidencial interno di ONU, filtra na The New Humanitarioan y mira pa AP, ta bisa cu decenas di server tabata comprometi, incluyendo na oficina di derecho humano di ONU, cual ta colecta datonan sensitivo y hopi biaha ta un rayo di critica pa gobiernonan autocratico pa expone abuso di derecho.
Tin tur indicacion cu apenas un grupo chikito di staf di ONU tabata na altura di e violacion. “Staf en general, incluyendo ami, no tabata na altura”, segun Ian Richars, presidente di Conseho di Staf basa na Geneva. E conseho ta defende bienestar di empleado di e cuerpo mundial.
Mirando e nivel halto di habilidad di e hacking, ta posibel cu un actor cu sosten estatal ta responsabel, segun un oficial anonimo. “No tin ni rastro di limpiesa”, el a bisa.
E reporte filtra dia 20 di september ta bisa cu logs cu lo revela actividad di e hackernan paden di red di ONU – na kico a haya acceso y kico a horta – tabata ‘cleared’. Tambe a mustra cu entre cuentanan conoci cu a haya acceso na nan tabata esunnan di administradonan di domain – kende automaticamente tin acceso na tur cuenta.
Jake Williams, CEO di compania di siguridad cibernetico Rendition Infosec y ex- hacker di gobierno Mericano, a bisa cu e hecho cu nan a clear e logs ta mustra cu nan no tabata e miho hacker. Esunnan cu mas habilidad – incluyendo agentenan Mericano, Ruso y Chino – por cubri nan rastro editando e logs na luga di clear nan. El a bisa cu definitivamente e intrusion ta parce spionahe.
Cualkier agencia di inteligencia rond mundo probablemente tin interes di infiltra ONU, segun Williams. E hack no tabata mucho severo na oficina di derechonan humano di ONU, segun su vocero, Rupert Colville. “Nada confidencial a ser comprometi.”
Vocero di ONU, Stephane Dujarric a bisa cu e atake a ‘resulta den compromiso di componentenan nuclear di infrastructura’ y a ‘determin’e como severo’. E actividad mas recien detecta relaciona cu e intrusion a tuma luga na juli y a ser detecta na augustus.
El a bisa cu e organisacion no tin suficiente informacion pa determina ken por ta tras di e atake, pero a agrega cu e ‘metodonan y herment uza den e atake ta indica un nivel halto di recurso, capacidad y determinacion’.
E documento interno di Oficina di Informacion y Tecnologia di ONU a bisa cu 42 server tabata ‘comprometi’ y otro 25 considera ‘sospechoso’, casi tur den oficina na Geneva y Vienna. Res di esunnan ‘comprometi’ ta pertenece na agencia di Derechonan Humano, localisa otro banda di ciudad for di oficina principal di ONU na Geneva, y dos tabata uza pa Comision Economico pa Europa di ONU.
Segun e reporte, e hackernan a saca bentaha di un fayo den software di Microsoft SharePoint pa infiltra e rednan, pero e tipo di malware cu nan a uza no ta conoci, ni tecniconan a identifica e comando y server di control riba internet uza pa exfiltra e informacion. Tampoco tabata conoci ki mecanismo e hackernan a uza pa mantene nan presencia den e rednan infiltra.
E reporte ta menciona un variedad di adres IP na Rumania cu por tabata uza pa prepara e infiltracion, y un ta reporta di tin bisiña cu historia di host malware.
Tecniconan na oficina di ONU na Geneva, e hub Europeo di e organisacion, na sikiera dos ocasion a traha den weekend den lunanan recien pa aisla e centro di data local di ONU for di internet, skirbi password di nobo y sigura cu e sistemanan tabata limpi. Mester a construi binti mashin di nobo, segun e reporte.
E hack ta yega entre preocupacion pa vulnerabilidad di computer of celular, tanto pa organisacionnan grandi manera gobierno y ONU, como individuo y negoshi.
Nacionnan Uni y su oficina di derechonan humano ta particularmente sensitivo, y por ta un obhetivo tentado. Alto Comisionado pa Derechonan Humano di ONU, Michelle Bachelete y su predecesornan a denuncia y critica supuesto crimennan di guera, crimen contra humanidad y violacionnan menos severo di derechona y abusonan den luganan diverso manera Siria y Saudi Arabia.
